chhattisgarh news : भिलाई: छत्तीसगढ़ स्वामी विवेकानंद तकनीकी विश्वविद्यालय (CSVTU) डहर ले एक ठन बड़ फैसला सुनाए गे हे। जांजगीर-चांपा अउ जीपीएम जिला म होए डी.फार्मेसी दूसर सेमेस्टर के परीक्षा म बड़े पैमाना म सामूहिक नकल अउ पेपर लीक होए के पुस्टि होए हे। एकरे सेती विवि ह 7 मई के होए ए परीक्षा ला निरस्त कर दिस हे। अब 7 कॉलेज के 526 परीक्षार्थी मन ला ए परीक्षा ला फिर से देना पड़ी।

वाट्सऐप ले पहुंच गे रीस पेपर अउ उत्तर, एआई के घलोक होइस प्रयोग

जांच म पता चले हे कि परीक्षा सुरू होए के आधा घंटा पहिली च प्रश्न अउ ओकर उत्तर मन ला वाट्सऐप के जरिया लइका मन तक पहुंचा दिए गए रीस। उड़नदस्ता दल ला जांच म कतकोन थन उत्तर पुस्तिका म एक जइसन उत्तर मिले हे। अचरज के बात ये हे कि परीक्षा केंद्र मन म लइका मन चैटजीपीटी अउ जेमिनी जइसन एआई (AI) प्लेटफॉर्म के मदद ले उत्तर लिखत पकड़ाए हें। नकल ला आसान बनाए बर केंद्र मन के सीसीटीवी कैमरा घलोक ला बंद कर दिए गए रीस।

वीक्षक के मोबाइल म मिलिस उत्तर अउ टेबल म 20 पन्ना के चिट

जांजगीर-चांपा के ज्ञान रौशनी फार्मेसी कॉलेज म जांच दल ला वीक्षक के टेबल ले च 20 पन्ना के नकल सामग्री मिलिस हे। उहें पामगढ़ के संस्कृति इंस्टीट्यूट म ड्यूटी म तैनात वीक्षक कमल कुमार के मोबाइल म परीक्षा के एमसीक्यू (MCQ) के उत्तर घलोक मिले हे, जेकर बाद विवि ह ओकर मोबाइल ला जब्त कर लिस। केसरी कॉलेज म त विवि के टीम ला सीसीटीवी के डीवीआर तक ला नहीं दिए गिस।

4 केंद्र मन के मान्यता होही रद, नई तारीख मन के घोषणा जल्दी

ए गड़बड़ी के बाद सीएसवीटीयू ह आयुष कॉलेज ऑफ फार्मेसी (मेदुका), केसरी कॉलेज ऑफ फार्मेसी, ज्ञान रौशनी कॉलेज ऑफ फार्मेसी अउ संस्कृति इंस्टीट्यूट ऑफ फार्मेसी के मान्यता ला खतम करे के कारवाही सुरू कर दिस हे। विवि डहर ले अब जल्दी च पुनर्परीक्षा बर नई तारीख मन के घोसना करे जाही।