मानसून के अगोरा खत्म : छत्तीसगढ़ में कतका दिन मा आही मानसून? मौसम विभाग ह बताईस नवा तारीख
chhattisgarh monsoon update : रायपुर। छत्तीसगढ़ मा जम्मो लोगन मन घाम अउ उमस ले बेहाल हें। अइसन मा सबो झन ला मानसून के अगोरा हे। मौसम विभाग ह मानसून ला लेके नवा अनुमान जारी करे हे, जेकर मुताबिक आघू के एक-दो दिन मा मानसूनी पानी गिरना शुरू हो सकत हे।
मौसम वैज्ञानिक मन के कहना हे कि छत्तीसगढ़ मा अब ‘लोकल इफेक्ट’ यानी स्थानीय कारन मन ले होवइया पानी रुक गे हे। अभी जो पानी गिरत हे, ओहा स्थानीय कारन ले नहीं बल्कि पूर्वी उत्तर प्रदेश ले लेके छत्तीसगढ़, ओडिशा अउ आंध्रप्रदेश तक बने द्रोणिका (ट्रफ) अउ हवा के चक्रवात के बड़ सिस्टम के सेती गिरत हे। अनुमान हे कि 12 जून तक मानसून ह छत्तीसगढ़ मा परवेस कर जही।
13 जून तक आंधी-पानी के चेतावनी
मौसम विभाग ह प्रदेश मा 13 जून तक आंधी-तूफान के संग पानी गिरे के चेतावनी (अलर्ट) जारी करे हे। बीते रात कुन घलो जोरदार पानी गिरे ले बिहनिया मौसम सुघर अउ ठंडा रेहिस, फेर मजहंते के बाद सुरुज देव के तेवर तीखे होगे अउ दिनभर बादर छाय के सेती उमस बाढ़ गे। अब्बड़ घाम के बाद अब संझा या रात कुन गरज-चमक के संग पानी गिरे के अंदेशा हे।
लोकल इफेक्ट के पानी नई होवन ले बढ़िस चिंता
मौसम विभाग के रिटायर्ड डिप्टी डायरेक्टर जनरल एमएल साहू ह बताईस कि पहिली के समे मा लोकल इफेक्ट के सेती मंझनिया के बाद सुघर पानी गिर जात रेहिस, जेकर ले धरती ह ठंडी हो जावत रेहिस। फेर अब बढ़त प्रदूषण के सेती लोकल इफेक्ट वाला पानी नई गिरत हे, जेहा चिंता के बिषय हे। अभी जो पानी गिरत हे, ओहा मौसम के बड़े सिस्टम के कारन गिरत हे।
