छत्तीसगढ़ के सरकारी कर्मचारी मन बर ‘मेडिटेशन लीव; शासन ह जारी करिस आदेस
Chhattisgarh Meditation Leave : रायपुर। छत्तीसगढ़ सरकार ह सरकारी अधिकारी अउ कर्मचारी मन के मानसिक सेहत अउ काम करे के ताकत ल बढ़ाए बर एक बड़े फैसला लिस हे। अब कर्मचारी मन ल ‘विपश्यना’ ध्यान सिबिर म जाय बर ‘मेडिटेशन लीव’ (बिसेस छुट्टी) मिलही। सामान्य प्रशासन विभाग कोति ले एकर आदेस घलो जारी कर दे गे हे।
आदेस म कहे गे हे कि मान्यता प्राप्त विपश्यना केंद्र मन म आयोजित 10 दिन के रहय वाला सिबिर म सामिल होय बर ये सुविधा दी जाही। कर्मचारी मन ल अपन पूरा नौकरी के बखत म जादा ले जादा 6 बार ये छुट्टी मिल सकही, जेकर म आय-जाय के समय ल मिला के कुल 12 दिन के छुट्टी निर्धारित करे गे हे। सरकार ह साफ कर दिस हे कि ये बखत ल ‘ऑन ड्यूटी’ माने जाही अउ कर्मचारी मन ल पूरा तनखा (वेतन) घलो मिलही। हालांकि, सिबिर म जाय के खरचा या यात्रा भत्ता सरकार ह नई देवय।
प्रवेस पत्र अउ प्रमाण-पत्र देना होही जरूरी छुट्टी बर अरजी (आवेदन) देवत बखत केंद्र कोति ले जारी प्रवेस पत्र दिखाना जरूरी होही। सिबिर पूरा होय के बाद ओकर प्रमाण-पत्र घलो दफ्तर म जमा करे बर पड़ही, नई त ओ छुट्टी ल दूसर छुट्टी म काट ले जाही। सरकार के ये फैसला ले कर्मचारी मन के मानसिक तनाव कम होही अउ काम म ओ मन के मन घलो जादा लगही।
