मंत्रालय म भड़किस करमचारी मन के गुस्सा:आंदोलन अउ तालाबंदी के दे दिस चेतउनी, जानव पूरा मामला
Chhattisgarh Mantralaya News : रायपुर। छत्तीसगढ़ मंत्रालय (महानदी भवन) म करमचारी मन के गुस्सा अब खुल के आघू आ गे हे। छत्तीसगढ़ मंत्रालय करमचारी संघ के आम सभा म करीब 700 झन करमचारी मन सामिल होइन अउ सासन के नीति अउ कुछु अधिकारी मन के रवैया ले नाराज होके आर-पार के लड़ाई के एलान कर दे हें। करमचारी मन के उग्र तेवर ल देख के अइसे लगत हे कि आघू जाके मंत्रालय म बड़का आंदोलन हो सकत हे अउ सासन बर मुसकुल खड़ा हो सकत हे।
विधानसभा ले पास सेटअप आदेस अब तक अटके हे
करमचारी मन के पहिली अउ बड़का गुस्सा ए बात ले हे कि विधानसभा ले पास होय के बाद घलो नवा सेटअप के आदेस अटके पड़े हे। मंत्रालय म नवा सेटअप ल केंद्रीय सचिवालय के तर्ज म लागू करे के तियारी हे, फेर ए मामला म सासन डहर ले कोई साफ़ बात नई होय ले करमचारी मन म संका अउ भरम हे। करमचारी मन के कहना हे कि सासन ल एमा जल्दी ले जल्दी फइसला लेना चाही।
सामान्य प्रशासन विभाग के उप सचिव ल हटाए के मांग
आम सभा म सामान्य प्रशासन विभाग (GAD) के एक झन उप सचिव के खिलाफ म घलो जम के गुस्सा निकलीस। ओकर ऊपर करमचारी-विरोधी रवैया अपनाए के अरोप लगावत तुरंत तबादला (हटाए) के मांग करे गे हे। संगे-संग करमचारी मन मांग करिन हे कि सामान्य प्रशासन विभाग के महत्वपूर्ण कक्ष-8 म अपर मुख्य सचिव या प्रमुख सचिव स्तर के कोनो बड़का अधिकारी ल बइठाय जाय, जेकर ले काम-काज अउ फइसला लेय म तेज़ी आय।
आउटसोर्सिंग अउ ई-ऑफिस ले बाढ़िस असंतोष
करमचारी मन खाली सेटअप ले नाराज नइ हें, भलुक विभाग मन म लगातार बाढ़त आउटसोर्सिंग (ठेका प्रथा) के घलो कड़ा विरोध करत हें। उंकर मानना हे कि ठेका प्रथा ले नियमित पद के महत्व खतम होवत हे, जेकर ले सरकारी नौकरी के आस म बइठे जुवा (युवा) मन के रद्दा बंद होवत हे। एकर अलावा ई-ऑफिस ले बाढ़त काम अउ रोज-रोज जारी होवत चिठ्ठी-पतरी ले घलो करमचारी मन भारी नाराज हें।
मांग नइ मानिस त होही तालाबंदी
आम सभा म सबो झन मिल के प्रस्ताव पास करिन अउ सरकार ल साफ चेतउनी दिस हे कि अगर उंकर मांग मन म जल्दी कोई बने फइसला नइ होही, त मंत्रालय म उग्र आंदोलन करे जाही। करमचारी मन तो इहां तक कह दे हें कि जरूरत परिस त मंत्रालय म ताला घलो जड़ देहीं। अब देखे बर पड़ही कि सरकार ए बबाल ल सांत करे बर का कदम उठाथे।
