छत्तीसगढ़ मा मखाना के धूम: धान ले कई गुना ज्यादा होही कमाई, धमतरी समेत 4 जिला मन मा खेती सुरू
Chhattisgarh Makhana Farming : रायपुर। छत्तीसगढ़ के किसान मन अब धान के साथ-साथ ‘नकदी फसल’ कोति घलो तेजी ले आघू बढ़त हें। अब हमर प्रदेश मा मखाना के खेती किसान मन बर कमाई के नवा अउ बड़े जरिया बनके आगू आवत हे।
छत्तीसगढ़ मा मखाना के अपार संभावना ला देखत हुए केंद्र सरकार के ‘मखाना विकास योजना’ ऊपर तेजी ले काम करे जावत हे। केंद्रीय कृषि मंत्री शिवराज सिंह चौहान के घोषणा के बाद अब राज्य मा मखाना के खेती अउ ओखर प्रसंस्करण (Processing) के काम मा तेजी आई हे।
178 लाख के बजट मंजूर, धमतरी-बालोद मा काम सुरू उद्यानिकी विभाग के अधिकारी मन बताइन कि साल 2025-26 ले ए योजना के क्रियान्वयन सुरू कर दे गे हे। एखर बर छत्तीसगढ़ ला 178 लाख 11 हजार रुपया के मंजूरी मिले हे। योजना बर धमतरी, बालोद, महासमुंद अउ गरियाबंद जिला मन के चयन करे गे हे।
धान ले कतको गुना ज्यादा फायदा मखाना के खेती के सबले बड़े खासियत ए हे कि किसान मन ह अगर सिरिफ कच्चा बीज ला न बेच के, ओला भून के अउ साफ करके ‘मखाना’ बना के बाजार मा बेचहीं, त ओ मन ला धान ले कई गुना ज्यादा लाभ मिलही। बाजार मा मखाना के मांग अभी बहुत ज्यादा हे।
महिला समूह मन घलो देखावत हें उत्साह धमतरी जिला मा त महिला स्व-सहायता समूह मन ह मखाना उगाना सुरू घलो कर दे हें। जिला मा लगभग 55 एकड़ मा तालाब मन मा बीज बोए के काम पूरा हो गे हे। ए काम मा शैल पुत्री, नई किरण अउ जय माँ नव ज्योति जइसन महिला समूह मन बढ़-चढ़ के हिस्सा लेवत हें। कुल मिला के 133 हेक्टेयर ले ज्यादा इलाका मा मखाना उगाए के लक्ष्य रखे गे हे।
