शराब घोटाला: चालान पेश होय के बाद सौम्या चौरसिया अउ केके श्रीवास्तव जेल ले रिहा होइस
Saumya Chaurasia : रायपुर। छत्तीसगढ़ के चर्चित शराब घोटाला मामला (आबकारी घोटाला) म पूर्व मुख्यमंत्री के उपसचिव रही सौम्या चौरसिया अउ तांत्रिक केके श्रीवास्तव ल बुधवार के रायपुर सेंट्रल जेल ले रिहा कर दे गे हवय। ईओडब्ल्यू (EOW) कोति ले कोर्ट म चालान पेश करे के बाद दूनों ल जमानत मिलिस।
1500 पन्ना के चालान म होइस बड़े खुलासा
ईओडब्ल्यू ह बुधवार के कोर्ट म सौम्या चौरसिया, केके श्रीवास्तव अउ देवेंद्र डडसेना के खिलाफ 1500 पन्ना के आठवां पूरक चालान पेश करिस। एमा दूनों के भूमिका ल लेके बड़े खुलासा करे गे हवय:
सौम्या चौरसिया: चालान के मुताबिक, सौम्या ह अपन पद के दुरुपयोग करत शराब घोटाला के सिंडिकेट ल संरक्षण अउ प्रशासनिक मदद पहुँचाईस। ओकर ऊपर शासन के राजस्व ल नुकसान पहुँचाए अउ षड्यंत्र म शामिल होय के आरोप प्रमाणित होय के बात कहे गे हवय।
केके श्रीवास्तव: केके श्रीवास्तव के ऊपर अवैध पैसा ल एक जगह ले दूसर जगह पहुँचाए, निवेश करे अउ सिंडिकेट म सक्रिय भूमिका निभाए के आरोप हवय।
हाईकोर्ट के शर्त के बाद मिलीस रिहाई
बता दन कि हाईकोर्ट ह सौम्या चौरसिया ल पहली ही जमानत दे दे रहीस, फेर एक शर्त रखे रहीस कि जिस दिन ईओडब्ल्यू कोर्ट म चालान पेश करही, ओही दिन ओमन जेल ले बाहर आ सकही। आज चालान पेश होय के बाद प्रक्रिया पूरा होइस अउ दूनों जेल ले बाहिर आ गे हवयं।
जेल ले निकल के केके श्रीवास्तव ह का कहिस?
जेल ले बाहिर आए के बाद केके श्रीवास्तव ह कहिस कि ओमन कोई तांत्रिक नो हन, बल्कि पूजा-पाठ करथय। ओमन कहिस कि पूर्व मुख्यमंत्री भूपेश बघेल ले ओकर पुराना संबंध हवय अउ ये संबंध व्यक्तिगत हवय, कोनो पार्टी ले ओकर लेना-देना नई हे। ओमन ये घलो कहिस कि ओमन कोनो गलत काम नई करे हवय, एसाती ओला कोनो कार्यवाही के डर नई हे।
का हवय पूरा मामला?
छत्तीसगढ़ म ये शराब घोटाला पहिली 2000 करोड़ के माने जावत रहीस, जो बढ़ के अब 3100 करोड़ तक पहुँच गे हवय। एमा बिना एक्साइज ड्यूटी चुकाए सरकारी दुकान मन ले नकली होलोग्राम लगा के शराब बेचे के आरोप हवय। ए मामला म ईडी अउ ईओडब्ल्यू ह अब तक कुल 51 आरोपी मन के खिलाफ चालान पेश कर डरे हवय।
