Chhattisgarh Liquor Hologram : छत्तीसगढ़ सरकार के मास्टरस्ट्रोक : अब दारू के बोतल में चमकही नासिक के होलोग्राम, नकली शराब बेचने वाला मन के अब खैर नई…
Chhattisgarh Liquor Hologram : रायपुर : छत्तीसगढ़ में पिछला सरकार के समय होय शराब घोटाला ले सबक लेके अब साय सरकार ह एक बड़का अउ कड़ा फैसला करे हे। अब हमर प्रदेश में बिकइया शराब के हर बोतल में कउनो साधारण स्टीकर नई, बल्कि भारतीय नोट कस सुरक्षा वाला होलोग्राम लगी। छत्तीसगढ़ ह देश के पहला अइसन राज्य बन गे हे, जेहा अपन शराब के होलोग्राम ला छपवाए बर सीधे नासिक (महाराष्ट्र) के नोट प्रिंटिंग प्रेस ला जिम्मेदारी दे हे।
Chhattisgarh Liquor Hologram : 7 लेयर वाला सुरक्षा: अब ककरो बस के बात नई हे
पिछला समय में होय 3200 करोड़ के शराब घोटाला में ‘नकली होलोग्राम’ के बड़का हाथ रिहिस। ए चोरी ला रोके बर अब आबकारी विभाग ह पूरा सिस्टम ला बदल दे हे। नासिक में जेहन होलोग्राम छपत हे, ओहा सात लेयर (7 Layers) के हे। एमा वही तकनीक के उपयोग होवत हे, जेकर ले हमर देश के नोट मन ला छापे जाथे। ए होलोग्राम के डुप्लीकेट (नकल) बनाना कतको कोनो बर नामुमकिन हे। अगर कउनो नकली बनाए के कोशिश घलो करही, त ओहा तुरंत पकड़ा जाही।
टेंडर के झंझट खत्म, सीधा केंद्र ले डील
पहिली का होवय, होलोग्राम छापे बर प्राइवेट कंपनी मन ला टेंडर दे जाय। एमा अफसर, नेता अउ व्यापारी मन के सिंडिकेट मिलके अपन पसंद के कंपनी ला काम देवय अउ फेर नकली-असली के खेल चलय। साय सरकार ह ए ‘टेंडर राज’ ला जड़ ले खत्म कर दे हे। अब कउनो टेंडर नई होवय; छत्तीसगढ़ आबकारी विभाग ह सीधा भारत सरकार के कंपनी ला आर्डर देथे। जतका छपाई होथे, उतने पइसा दे जाथे। एमा अब बिचौलिया मन बर कउनो जगह नई बचे हे।
सरकार के जेब ले एको रुपया नई जाय
सबले नीक बात ये हे कि ए सुरक्षा बर हर साल करीब 75 करोड़ रुपया के खरचा आवत हे, फेर ए पइसा ला सरकार ला नई देना पड़य। छत्तीसगढ़ में जतका घलो बॉटलिंग कंपनी हें, ओ मन अपन आर्डर के हिसाब ले होलोग्राम के पइसा ला पहिली ही सरकार करा जमा कर देथें। सरकार ह वही पइसा ला नासिक प्रेस ला दे देथे।
सुरक्षित छपाई के चार ठन ठिकाना
बता दन कि पूरा भारत में नोट अउ जरूरी कागज मन के छपाई खाली चार जगह—नासिक, देवास, मैसूर अउ सालबोनी में होथे। छत्तीसगढ़ सरकार ह नासिक प्रेस ला चुन के ये साफ कर दे हे कि अब अवैध शराब अउ तस्करी ऊपर कड़ा लगाम कसना हे।
