छत्तीसगढ़ मा सेहत के गजब आंकड़ा: हर पांचवां पुरुष हाईपरटेंशन के सिकार, गांव के महिला मन जादा स्वस्थ

Chhattisgarh health news : रायपुर। छत्तीसगढ़ मा माईलोगन (महिलाएं) मन पुरुष मनके भरोसा जादा सुख-चैन के जिनगी जीअत हें, इही कारन हे कि ओमन मा ब्लड प्रेशर (बीपी) के समस्य हर पुरुष मनके मुकाबला मा कम हे। अब बिचारे मुड़झमउहा (पुरुष) मन का करहीं! घर-परिवार, रोजी-रोटी अउ कारोबार के चिन्ता ओमन ला अइसन धरे हे कि वे मन भारी तनाव के सिकार होवत हें।

हालत अइसन होगे हे कि हमर राज (राज्य) मा हर पांचवां सयान पुरुष हाईपरटेंशन (उच्च रक्तचाप) के सिकार हे। एकर पाछू तेजी से बदलत जिनगी के तरीका, खाय-पिए के ढंग अउ सरीर के मिहनत मा कमी एक बड़ कारन हे। ये सब बात राष्ट्रीय परिवार स्वास्थ्य सर्वेक्षण-6 (NFHS-6) के नवा आंकड़ा मा अगम ले निकलके आगू आए हे। ये आंकड़ा बताथे कि राज मा 15 साल अउ ओकर ले जादा उमिर के लगभग हर पांचवां पुरुष अउ महिला मा हाई बीपी के समस्य मउजूद हे।

सहर के मनखे मनला जादा खतरा आंकड़ा के मुताबिक, देहात (ग्रामीण) इलाका के भरोसा सहर मा रहेइया मनखे मनला हाई बीपी के जादा खतरा हे। सहरी इलाका मा 24.3 प्रतिसत अउ देहाती इलाका मा 20 प्रतिसत पुरुष मन मा उच्च रक्तचाप पाए गे हे। सहर के भाग-दउड़, तनाव अउ सुस्ताय जिनगी एकर बड़ कारन आय। सर्वेक्षण मा 11.6 प्रतिसत पुरुष मनके बीपी मध्यम स्तर मा अउ 3.2 प्रतिसत पुरुष मनके बीपी गंभीर श्रेणी मा पाए गे हे। माईलोगन मनके बात करन त सहर मा 21.6 प्रतिसत अउ गांव मा 17.6 प्रतिसत महिला मन मा हाई बीपी दरज करे गे हे, यानी गांव के हाल अभी घलो बेहतर हे।

सक्कर अउ मोटाई घलो बढ़ावत हे आफत ये सर्वेक्षण मा सिरिफ बीपी नई, बल्कि सुगर (मधुमेह) अउ मोटाई के घलो बढ़त मामला आगू आए हे। महिला मन मा 20.3 प्रतिसत अउ पुरुष मन मा 16.1 प्रतिसत लोगन मन जादा वजन या मोटाई के घेरा मा हें। डाक्टर मनके कहना हे कि मोटाई, सुगर अउ हाई बीपी एक-दूसर ले जुड़े हें, जेकर से आगे चलके दिल के बीमारी (हार्ट अटैक), स्ट्रोक अउ किडनी खराब होय के खतरा बाढ़ जाथे। स्वास्थ्य विशेषज्ञ मनके कहना हे कि बीपी ला ‘साइलेंट किलर’ कहे जाथे, काबर कि सुरु मा एकर पता नई चले। एकर बर बेरा-बेरा मा जांच कराना, नीक अउ सादा खाना खाय अउ जागरूक रहना बहुतेच जरूरी हे।