आंबेडकर अस्पताल म खुलही छत्तीसगढ़ के पहली मदर मिल्क बैंक, विश्व ब्रेस्ट फीडिंग सप्ताह म मिलिस बड़का सौगात

Chhattisgarh Mother Milk Bank : रायपुर: पंडित जवाहरलाल नेहरू मेडिकल कॉलेज से जुड़े आंबेडकर अस्पताल म प्रदेश के पहली मदर मिल्क बैंक खोले जाही। एकर घोषणा गुरुवार के कॉलेज के ऑडिटोरियम म आयोजित वर्ल्ड ब्रेस्ट फीडिंग सप्ताह के मौका म स्वास्थ्य मंत्री श्यामबिहारी जायसवाल करही। मदर मिल्क बैंक खुले के फायदा ओ महतारी मन ला मिलही, जेकर नवजात लइका मन ला दूध पीए म परेशानी होथे। इहां नीरोग अउ सुघर महिला मन दूध दान घलो कर सकही।

महतारी अउ लइका मन के स्वास्थ्य सेवा ला बनाना हे मजबूत अटल बिहारी वाजपेयी ऑडिटोरियम म होवइया कार्यक्रम म प्रदेश के 10 अइसन महतारी मन ला ‘माता यशोदा सम्मान’ दे जाही, जेमन दूध दान करके या आन लइका मन ला दूध पिया के मानवता अउ महतारीपन के सुघर मिसाल पेश करे हवयं। कार्यक्रम के मुख्य उद्देश्य मां के दूध के महत्व ला लेके जागरुकता बढ़ाना, नवजात अउ लइका मन के सही पोषण अउ सुघर स्वास्थ्य ला बढ़ावा देना हे।

मां के दूध लइका बर सर्वोत्तम आहार, बीमारी मन ले बचाथे जनम के पहिली 6 महीना तक लइका बर मां के दूध ह एकमात्र अउ सबले बढ़िया आहार हवे। पहिली गाढ़ा पीला दूध (कोलोस्ट्रम) लइका ला सुरुआती बीमारी अउ इंफेक्शन ले लड़े के ताकत देथे। दूध म मौजूद एंटीबॉडीज अउ पोषक तत्व लइका के इम्युनिटी ला मजबूत करथे अउ ओला झाड़ा (दस्त), निमोनिया अउ पेट के बीमारी ले बचाथे। मां के दूध लइका के कोमल पेट म आसानी ले पच जाथे।

कोण महिला मन कर सकथयं दूध के दान?

• महतारी ह पूरी तरह ले नीरोग होना चाही अउ ओकर अपन लइका बर पर्याप्त दूध होए।

• एचआईवी, हेपेटाइटिस बी, हेपेटाइटिस सी या सिफलिस जइसन गंभीर अउ छुआछूत के बीमारी न होए।

• जे महिला मन तंबाकू, बीड़ी-सिगरेट, दारू या कोनो किसम के नशा झन करत होयं।

• जे महतारी मन अइसन भारी दवाई झन खावत होयं, जेखर असर दूध के रद्दा लइका तक पहुंच सकथे।

कोण महतारी मन दूध दान नई कर सकयं? जेमन ला एचआईवी या रकत संबंधी कोनो इंफेक्शन हे, या जेमन नशा करथयं, ओमन दूध दान नई कर सकयं। पीडियाट्रिक्स विभाग के एचओडी डॉ. शारजा फुलझेले ह बताइन कि महतारी मन ला कम ले कम 6 महीना ले एक साल तक लइका ला स्तनपान जरूर कराना चाही, एकर ले ब्रेस्ट कैंसर के खतरा घलो टल जाथे।