छत्तीसगढ़ बजट 2026: साय सरकार के पिटारा खुल गे, जानव का-का निकलिस

रायपुर। छत्तीसगढ़ के वित्त मंत्री ओपी चौधरी ह आज विधानसभा म साय सरकार के तीसरा बजट पेस करिन। प्रदेश के इतिहास के सबले बड़े बजट पढ़त हुए मंत्री जी ह नक्सल प्रभावित बस्तर अउ सरगुजा अंचल बर खजाना खोल दीन। बस्तर के विकास अउ उहां के लइका मन के पढ़ाई-लिखाई बर विशेष जोर देवत हुए सरकार ह कतको नवा घोषणा करिस हे।

बजट के खास बात मन (छत्तीसगढ़ी म):

• बस्तर-सरगुजा बर सौगात: अबूझमाड़ अउ जगरगुंडा म दू ठन ‘एजुकेशन सिटी’ बनही, जेकर बर 100 करोड़ के प्रावधान हे। बस्तर अउ सरगुजा विकास प्राधिकरण बर 75 करोड़ रुपिया दे गे हे।

• खेती-किसानी: कृषक उन्नति योजना बर 10 हजार करोड़ के भारी-भरकम राशि रखे गे हे। भूमिहीन खेतिहर मजदूर मन बर 600 करोड़ अउ कृषि पंप मन बर 5500 करोड़ के प्रावधान हे। अब दलहन-तिलहन घलो उन्नति योजना म सामिल रहिही।

• स्वास्थ्य अउ सुविधा: दंतेवाड़ा, मनेंद्रगढ़, कबीरधाम, जांजगीर-चांपा अउ कुनकुरी म नवा मेडिकल कॉलेज खुलही। मितानिन कल्याण निधि बर 350 करोड़ अउ आयुष्मान योजना बर 1500 करोड़ रुपिया दे जाही।

• शिक्षा अउ युवा: नीट (NEET) अउ क्लैट (CLAT) के तैयारी करइया लइका मन के मदद बर 35 करोड़ के प्रावधान हे। रायपुर, दुर्ग अउ बिलासपुर म CGIT खुलही अउ रायपुर म एक ठन होम्योपैथी कॉलेज घलो बनही।

• राजधानी रायपुर बर: रायपुर म मेट्रो रेल चलाए बर सर्वे होही। शहर म अंडरग्राउंड बिजली लाइन बर 100 करोड़ अउ खाद जांच बर लैब घलो बनाय जाही। मेकाहारा म एआई (AI) तकनीक बर 10 करोड़ रुपिया दे गे हे।

• महतारी अउ सियान मन बर: प्रदेश भर म 250 ठन ‘महतारी सदन’ बनही जेकर बर 75 करोड़ के बजट हे। सियान मन बर ‘सियान गुड़ी’ ल डे-केयर सेंटर के रूप म विकसित करे जाही।

• सड़क अउ आवास: मुख्यमंत्री द्रुतगामी सड़क योजना बर 200 करोड़ अउ प्रधानमंत्री आवास योजना बर 800 करोड़ के प्रावधान करे गे हे।