CGMSC घोटाला मामला: मोक्षित कॉर्पोरेशन के डायरेक्टर मन ला सुप्रीम कोर्ट ले मिलिस जमानत
CGMSC Scam : रायपुर: छत्तीसगढ़ के बहुचर्चित CGMSC घोटाला मामला म एक बड़े खबर आगू आए हे। घोटाला के आरोपी मोक्षित कॉर्पोरेशन के डायरेक्टर शशांक चोपड़ा अउ कमलकांत पाटनवार ला सुप्रीम कोर्ट ले जमानत मिल गे हे।
बताय जात हे कि हाईकोर्ट ले जमानत याचिका खारिज होय के बाद दूनों आरोपी मन ह सुप्रीम कोर्ट के दरवाजा खटखटाय रहिन, जिहां ले ओमन ला राहत मिलीस हे। ईओडब्ल्यू (EOW) डाहर ले दर्ज एफआईआर के बाद ले दूनों आरोपी रायपुर के सेंट्रल जेल म बंद रहिन।
660 करोड़ के घपला के आरोप भूपेश बघेल सरकार के बेरा म छत्तीसगढ़ मेडिकल सर्विसेज कॉर्पोरेशन लिमिटेड (CGMSC) म मोक्षित कॉरपोरेशन के माध्यम ले करोड़ों के घपला करे के मामला ‘ऑडिट रिपोर्ट’ ले खुले रहिस। ऑडिट टीम के मुताबिक, साल 2022-23 अउ 2023-24 म बिना बजट के 660 करोड़ रुपया के खरीदी करे गे रहिस। नियम-कानून ला ताक म रखके अइसन अस्पताल मन म घलो मशीन अउ केमिकल सप्लाई कर दिए गे रहिस, जिहां ओकर जरूरत हेच नई रहिस।
अधिकारी मन के घलो सामिल होय के आशंका ईओडब्ल्यू ह अपन एफआईआर म स्वास्थ्य विभाग के बड़े अधिकारी मन के खिलाफ घलो अपराध दर्ज करे हे। जांच म पता चलिस कि प्रदेश के 776 प्राथमिक स्वास्थ्य केंद्र मन म अइसन सामान भेज दिए गे रहिस, जिहां ओला रखे के जगा तक नई रहिस। अफसर अउ कंपनी के मिलीभगत ले सरकार ला अरबों रुपया के चपत लगाय के आरोप हे। अब सुप्रीम कोर्ट ले जमानत मिले के बाद ए मामला म नवा मोड़ आ सकत हे।
