शुरू होईस ‘अन्नपूर्ति ग्रेन एटीएम’: बायोमेट्रिक अंगूठा लगावत ही थैला में गिरत हे चावल
बिलासपुर, Grain ATM: छत्तीसगढ़ में सार्वजनिक वितरण प्रणाली में तकनीक के उपयोग ले राशन बांटे के तरीका अब तेज़ी ले बदलत हे। राशन दुकान में लंबा लाइन, अपन बारी के अगोरा अउ तौल ल लेके होवईया चिंता जइसन झंझट ले अब हितग्राही मन ल छुटकारा मिल गे हे अउ कुछूच मिनट में राशन मिल जात हे। सरकंडा में शुरू करे गे ‘अन्नपूर्ति ग्रेन एटीएम’ व्यवस्था ले राशन बांटे के प्रक्रिया ह तकनीक आधारित अउ पारदर्शी बने बर नवा कदम उठाय हे।
अन्नपूर्ति ग्रेन एटीएम सरकंडा में शुरू होए ”अन्नपूर्ति ग्रेन एटीएम” के नवा व्यवस्था में राशन लेवे के काम कुछूच मिनट में पूरा हो जावत हे। तकनीक ले जुड़े ए पहल के शुरुआत के संग हितग्राही मन के समय बचत हे, सही तौल मिलत हे अउ पारदर्शी बांट के अनुभव होवत हे।
राशन लेवे के अनुभव अब पहिली ले अलग चिंगराजपारा के रहे वईया हितग्राही प्रीति मानिकपुरी बर राशन लेवे के अनुभव अब पहिली ले बहुत अलग हे। ओ हा बताथें कि अब लंबा लाइन में ठाढ़े होके अगोरा नई करे बर परै। मशीन के माध्यम ले राशन मिले ले काम आसान हो गे हे अउ तौल ल लेके घलो काकरो मन में कोनो चिंता नई राहे। ओसनेच हितग्राही दुर्गेश कुमार यादव बताथें कि ग्रेन एटीएम में बायोमेट्रिक सत्यापन के बाद स्क्रीन में ओमन के पात्रता के हिसाब ले मिले वईया राशन के मात्रा साफ-साफ दिखथे। पुष्टि करे के बाद डिस्पेंसर के नीचे बोरा या थैला धरतेच नापे गे चावल सीधे थैला में भरा जाथे। ए अनुभव न सिर्फ आसान हे, बल्कि राशन के मात्रा ल लेके भरोसा ल घलो बढ़ावत हे।
तकनीक के संग बढ़त हे भरोसा ”अन्नपूर्ति ग्रेन एटीएम” सार्वजनिक वितरण प्रणाली में तकनीक के प्रयोग कोती एक ठन नवा पहल ए। बायोमेट्रिक सत्यापन ले लेके स्क्रीन में पात्रता के जानकारी अउ तय मात्रा में राशन के अपने-आप बांटे के पूरा प्रक्रिया हितग्राही के सोझा में होथे। एखर ले बांटे के व्यवस्था में पारदर्शिता अउ जवाबदेही ल मजबूती मिलत हे। अभी ए नवा व्यवस्था के शुरुआत भर होए हे, फेर शुरुआती दिन में ही एखर असर दिखे बर धर ले हे।
राशन लेवे में लगे वईया समय होगे कम राशन लेवे में लगे वईया समय कम हो गे हे अउ हितग्राही मन के भरोसा बढ़े हे। आवत समय में ए पहल सार्वजनिक वितरण प्रणाली ल अउ ज़्यादा सरल, पारदर्शी अउ तकनीक आधारित बनाए के दिशा में बड़े कदम साबित हो सकत हे। छत्तीसगढ़ सरकार के ए नवा पहल तकनीक ल जनसुविधा ले जोड़त हुए ए संदेश देथे कि सरकार के योजना मन के लाभ केवल पहुंचाना भर नई, बल्कि ओला सम्मानजनक, सरल, पारदर्शी अउ समय में हितग्राही मन तक पहुंचाना घलो ओतकेच जरूरी हे।
