काली आही 10वीं-12वीं बोर्ड के रिजल्ट, शिक्षा मंत्री गजेंद्र यादव ह करिन घोषणा
CGBSE Board Result 2026 : रायपुर। छत्तीसगढ़ में 10वीं-12वीं बोर्ड परीक्षा के परिणाम 29 अप्रैल बुधवार के जारी होही। एखर घोषणा शिक्षा मंत्री गजेंद्र यादव ह करिन हे। ओमन एक्स (ट्विटर) ऊपर पोस्ट करके लिखिन हे कि अगोरा के बेरा अब खतम होय वाला हे। बुधवार के मझा मं 2:30 बजे माध्यमिक शिक्षा मंडल के हाईस्कूल अउ हायर सेकेंडरी परीक्षा के परिणाम औपचारिक रूप ले घोषित करे जाही।
ओमन कहिन कि ये सिरिफ अंक मन के घोषणा नोहे, बल्कि बछर भर के मेहनत, अनुशासन अउ दाई-दादा व गुरु जन मन के मार्गदर्शन के फल आय। ए मौका में सबो लइका मन ल धीरज धरे, रिजल्ट ल सकारात्मक भाव ले स्वीकार करे अउ आगू बढ़े के सुभकामना घलो दीन। ओमन कहिन कि हर रिजल्ट ह एक नवा सुरूआत के संकेत आय अउ हर लइका में आगू बढ़े के अपार शक्ति भरे हे।
बता दन कि बोर्ड परीक्षा ह 20 अउ 21 फरवरी ले सुरू होय रिहिस, जेकर आखिरी पेपर 18 मार्च के रिहिस। पहिली बोर्ड ह 15 अप्रैल तक रिजल्ट निकाले के योजना बनाय रिहिस, पर हिंदी के पेपर लीक होय के मामला आए के सेती 10 अप्रैल के दोबारा परीक्षा लेहे बर परिस, जेखर वजह ले रिजल्ट में थोरकिन देरी हो गे।
लाखों लइका मन करत हें अगोरा ये बछर हाईस्कूल (कक्षा 10वीं) परीक्षा में कुल 3,20,535 लइका मन फॉर्म भरे रिहिन, जबकि हायर सेकेंडरी (कक्षा 12वीं) में 2,45,785 झन परीक्षा दीन हें। कतको लइका मन आगू के पढ़ाई अउ प्रवेश परीक्षा बर रिजल्ट के भारी अगोरा करत हें।
पिछला बछर के रिजल्ट रिहिस बढ़िया पिछला बछर 7 मई 2025 के बोर्ड ह रिजल्ट घोषित करे रिहिस। उबेरा 10वीं में 68.76% लइका मन पास होय रिहिन, जबकि 12वीं के रिजल्ट 82.25% रिहिस। अब सबो झन के नजर बोर्ड के अधिकारिक घोषणा ऊपर टिके हे, जेखर ले लइका अउ दाई-दादा मन के अगोरा ह खतम हो सकय।
