CG Youth Festival 2025 : आज ले राज्य युवा महोत्सव के धूम, 3000 युवा मन देखाहीं अपन कला…
CG Youth Festival 2025 : बिलासपुर : छत्तीसगढ़ के बिलासपुर स्थित बहतराई खेल प्रशिक्षण केंद्र में आज, 23 दिसंबर ले तीन दिन के ‘राज्य युवा महोत्सव’ के बड़े जोर-शोर से सुरूआत होवत हे। खेल अउ जुवा कल्याण विभाग डहर ले आयोजित ए मेला में प्रदेश भर के लगभग 3000 जुवा मन हिस्सा लेवत हें। ए कार्यक्रम के अध्यक्षता उपमुख्यमंत्री अरुण साव जी करिहीं। संग मा विधानसभा अध्यक्ष डॉ. रमन सिंह, उपमुख्यमंत्री विजय शर्मा अउ केंद्रीय मंत्री तोखन साहू घलो विशेष अतिथि के रूप मा शामिल होहीं। आयोजन के आखिरी दिन, यानी 25 दिसंबर के राज्यपाल रमेन डेका जी विजेता मन ल इनाम बांटिहीं।
CG Youth Festival 2025 : 14 खेल अउ कला मा होही भिड़ंत
ए महोत्सव मा कुल 14 किसम के प्रतियोगिता होही, जेमा 8 ठन दलीय (ग्रुप) अउ 6 ठन एकल (अकेल्ला) विधा शामिल हे। दलीय विधा मा हमर छत्तीसगढ़ के सुग्घर संस्कृति जैसे—पंथी, राउत नाचा, सुआ, करमा, लोकनृत्य अउ लोकगीत के रंग दिखे बर मिलही। एकल विधा मा वाद-विवाद, कहानी, पेंटिंग अउ कविता लेखन जइसन प्रतियोगिता होही। जे मन ए राज्य स्तरीय प्रतियोगिता मा जीतहीं, ओ मन ल अगले साल दिल्ली मा होवइया ‘राष्ट्रीय युवा महोत्सव-2026’ मा छत्तीसगढ़ डहर ले भेजे जाही।
विजेता मन बर इनाम के बौछार
जुवा मन के उत्साह बढ़ाए बर सरकार ह इनाम के घलो बढ़िया व्यवस्था करे हे। ग्रुप प्रतियोगिता मा पहिली नंबर आए वाला ल 20 हजार, दूसरा ल 15 हजार अउ तीसरा ल 10 हजार रुपिया मिलही। अकेले भाग लेवइया मन ल घलो 5 हजार ले 2 हजार रुपिया तक के इनाम दे जाही। सबले बढ़िया बात ये हे कि महोत्सव मा भाग लेवइया हर एक झन ल 1-1 हजार रुपिया के प्रोत्साहन राशि घलो दे जाही।
कुमार विश्वास अउ आरू साहू जमाहीं रंग
ए तीन दिन मा सांस्कृतिक कार्यक्रम के घलो बड़े धूम रही। आज 23 दिसंबर के सांझ कुन अनुज शर्मा के ‘आरूग बैंड’ अउ नारायणपुर के मल्लखंब के प्रदर्शन होही। रात कुन बिलासपुर के पुलिस ग्राउंड मा कवि सम्मेलन होही, जेमा नामी कवि डॉ. कुमार विश्वास अपन कविता सुनाहीं। दूसरा दिन 24 दिसंबर के काफिला बैंड अउ आखिरी दिन 25 दिसंबर के हमर छत्तीसगढ़ के बेटी आरू साहू अउ बस्तर के ‘दायरा बैंड’ अपन प्रस्तुति देहीं। ए आयोजन मा पहली पइत ‘खेलो इंडिया ट्रायबल गेम्स’ के घलो लॉन्चिंग करे जाही।
