CG Weather Update : रायपुर समेत आज 27 जिला म अंधड़ अउ पानी के अलर्ट जारी
CG Weather Update : रायपुर। छत्तीसगढ़ म दक्खिन-पच्छिम मानसून ह बड़ तेजी से आगू बढ़त हे। 22 जून के दंतेवाड़ा के रद्दा ले राज म संचरइया मानसून ह सिरिफ़ 24 घंटा म आधा ले जादा छत्तीसगढ़ म छा गे हे। एही तेज रफ्तार के सेती मानसून ह अपन दूसरे दिन च राजधानी रायपुर म घलो झमाझम दस्तक दे दीस। मौसम विभाग के कहना हे कि आघू के एक हफ्ता तक जम्मो राज म मौसम अइसने बिगड़े रही। कोरिया, गौरेला-पेंड्रा-मरवाही अउ कबीरधाम कोति घलो मानसून ह कभू भी पहुंच सकत हे।
मंगलबार के संझा कुन रायपुर समेत कतकोन जिला म अइसन बादर गरजिस अउ पानी गिरिस कि लोगन मने-मन जुड़वा गे हें। घाम अउ उमस ले बड़ राहत मिलीस हे। झमाझम पानी गिरे के सेती जम्मो राज म पारा ह 40 डिग्री ले नीचे उतर गे हे। मंगलबार के सबले जादा घाम बिलासपुर म 39 डिग्री अउ सबले कम तापमान राजनांदगांव म 22 डिग्री दरज करे गिस।
इहां-इहां परिस पानी
पाछू 24 घंटा म डौंडी अउ नांगर म सबले जादा 5-5 सेंटीमीटर पानी गिरिस। एकर अलावा मैनपुर अउ धमतरी म 4-4 सेंटीमीटर, अउ सरसीवा, कांकेर, कुकरेल, दरभा, नगरी, भटगांव, जगदलपुर, अउ राजनांदगांव कोति 3-3 सेंटीमीटर पानी परिस। बस्तर, पाटन, गरियाबंद, चारामा अउ कुरुद म घलो 2-2 सेंटीमीटर बरखा दरज करे गे हे।
आज 27 जिला म अंधड़-बिजली के चेतावनी
मौसम विभाग ह आज बिहनिया ले राज के 27 जिला बर आंधी-पानी अउ बिजली गिरे के अलर्ट जारी करे हे। कोंडागांव, उत्तर बस्तर कांकेर, धमतरी, गरियाबंद अउ महासमुंद जिला बर ऑरेंज अलर्ट जारी करत हुए 60 किलोमीटर के रफ्तार ले अंधड़ चले अउ भारी पानी गिरे के बात कहे हे।
एकर संग च रायपुर, दुर्ग, बिलासपुर, कोरबा, रायगढ़, जशपुर, सरगुजा, सूरजपुर, बलरामपुर, बेमेतरा, बालोद, राजनांदगांव, कबीरधाम, मुंगेली, जांजगीर-चांपा, बलौदाबाजार, सुकमा, बीजापुर, दंतेवाड़ा अउ नारायणपुर जिला म 40 किलोमीटर के रफ्तार ले हवा चले अउ बादर गरजे के संग पानी गिरे बर येलो अलर्ट जारी करे गे हे।
रायपुर म आज कइसन रही मौसम?
राजधानी रायपुर म आज घलो बादर छाय रही। मौसम वैज्ञानिक मन के कहना हे कि आज बुधवार के दिन शहर म बादर गरज सकत हे, तेज हवा चल सकत हे अउ पानी घलो गिर सकत हे, जेकर ले गरमी अउ कम होही। आज रायपुर के जादा ले जादा तापमान 35 डिग्री अउ कम ले कम तापमान 25 डिग्री के आसपास रहि सकत हे।
