CG News : कौही म राशन बर मचे हे हाहाकार : दिसंबर बीतत हे पर नई मिलिस चांउर, अधिकारी मन के चुप्पी ले गुसाए ग्रामीण बईठे हे धरना में
CG News : रानीतराई। छत्तीसगढ़ के दुर्ग जिला म आने वाला ग्राम पंचायत कौही म सरकारी राशन दुकान के मनमानी ह सीमा पार कर दे हे। दिसंबर के महीना आधा ले जादा बीत गे हे, पर गरीब मन ला अभी तक ओखर हक के चांउर नई मिले हे। राशन बर तरसत ग्रामीण मन के गुस्सा अब फूट गे हे अउ ओमन दुकान के आगू म धरना म बइठ गे हें।
CG News : आखिरी दिन खुलथे दुकान, आधा झन लहुटथें खाली हाथ
ग्रामीण मन के आरोप हे कि राशन दुकान के संचालक ह अपन मनमर्जी चलाथे। दुकान ह महीना के आखिरी म खुलथे अउ आधा लोगन मन ला राशन दे के बाद ‘स्टॉक खत्म हो गे’ कह के भगा दे जाथे। अचरज के बात ये हे कि पिछला महीना के राशन ला ए महीना बांटे गिस, अउ ए महीना (दिसंबर) के राशन के अभी तक कोनो अता-पता नई हे।
जांच के नाम म सिरिफ खानापूर्ति
राशन वितरण म होवत ए धांधली के शिकायत ग्रामीण मन ह खाद्य विभाग ले करे रिहिन। शिकायत के बाद अधिकारी मन गांव पहुंचिन, मुआयना घलो करिन अउ आश्वासन दीन कि पाटन एसडीएम ला रिपोर्ट सौंप के कार्रवाई करे जाही। फेर 12 दिन बीत गे हे, न रिपोर्ट के पता हे अउ न ही कार्रवाई के। अधिकारी मन के ए सुस्त चाल ले संचालक के हौसला अउ बाढ़ गे हे।
ग्रामीण मन दे हें चेतावनी
कौही के लोगन मन के कहना हे कि अधिकारी मन सिरिफ आश्वासन देथें, पर काम कुछू नई होवय। गरीब मन के घर म चूल्हा जरना मुस्किल हो गे हे। ग्रामीण मन चेतावनी दे हें कि अगर जल्दी ले दिसंबर के चांउर नई बांटे गिस अउ लापरवाह संचालक ऊपर गाज नई गिरिस, त ओमन पाटन एसडीएम दफ्तर के घेराव करही।
