एक अप्रैल ले मैन्युअल सिस्टम ले चालान हो जाही बंद, अब सिरिफ ऑनलाइन ही जमा होही
Online Challan : रायपुर। राज्य सरकार के डाहर ले जारी निर्देश के मुताबिक, छत्तीसगढ़ में 1 अप्रैल ले मैन्युअल सिस्टम (हाथ ले भरे वाला) ले चालान जमा करे के काम ल पूरी तरह ले बंद कर दे जाही। अब जिला कोषालय मन में सिरिफ ऑनलाइन माध्यम ले ही चालान जमा करे जा सकही।
नवा व्यवस्था के जानकारी अफसर अऊ कर्मचारी मन ल दे बर सोमवार के एक दिन के प्रशिक्षण शिविर (ट्रेनिंग) रखे गे रहिस। एमा जिला कोषालय अधिकारी गजानन पटेल ह आहरण संवितरण अधिकारी, स्टांप वेंडर अऊ बैंक के प्रतिनिधि मन ल ओटीसी (ओवर द काउंटर) ऑनलाइन चालान जमा करे के तरीका ल विस्तार ले समझाइस।
शासकीय कन्या पॉलीटेक्निक बैरनबाजार में होय ए जिला स्तरीय कार्यशाला में पटेल ह बताइस कि मैन्युअल सिस्टम ले चालान जमा करे में जेकर गलती होय के डर रहिथे, ओहा अब ओटीसी ऑनलाइन चालान ले नई होही। एमा सही मद के चुनाव करना घलो सुुबिधाजनक होही, जेकर ले बैंक अऊ कोषालय के काम में पारदर्शिता (सफाई) आही।
कार्यशाला में ये घलो बताय गिस कि संचालनालय कोष अऊ लेखा डाहर ले नवा वित्तीय बछर में 1 अप्रैल ले मैन्युअल चालान सिस्टम ल खत्म करके ऑनलाइन चालान जमा करे के सुबिधा सुरू करे जावत हे। ऑनलाइन चालान ल ‘ई-कोष’ ऑनलाइन पोर्टल के भीतर ‘ई-चालान’ मॉड्यूल ले जमा करे जा सकही। ए प्रक्रिया में चालान के जम्मो डाटा सीधा बैंक ल ऑनलाइन ट्रांसफर हो जाही।
