1 जुलाई ले बिजली बिल मा 30 ले 50 पैसा प्रति यूनिट के बढ़त, बिल पटाय मा देरी होय ले अब नहीं लगे जुर्माना, CSERC ह बदलिस नियम
CG Electricity Bill New Rules : रायपुर। छत्तीसगढ़ मा बिजली बऊरइया मन बर 1 जुलाई ले नियम मा बड़ बदलाव होय जावत है। छत्तीसगढ़ राज्य विद्युत नियामक आयोग (CSERC) ह बिजली खपत के नवा टैरिफ के संग लेट पेमेंट सरचार्ज (बिल पटाय मा देरी होय मा लगने वाला जुर्माना) के ब्यवस्था ला घलोक बदल दे है। अब बिजली बिल जमा करे मा देरी होय ले जुर्माना के गिनती नवा तरीका ले करे जाही। नवा ब्यवस्था मा उपभोक्ता मन ला ओतके दिन के सरचार्ज देबड़ लगही, जतके दिन बिल पटाय मा देरी होही। ए बदलाव के उदेस बिलिंग के तरीका ला अउ असान, साफ-सुथरा अउ उपभोक्ता मन के हित मा बनाना है।
अब तक बिजली बिल जमा करे मा देरी होय ले उपभोक्ता मन ला डेढ़ परसेंट प्रति महीना के दर ले लेट पेमेंट सरचार्ज देबड़ परत रीहिस। एमा एक-दो दिन के घलोक देरी होय मा पूरा महीना के जुर्माना लग जावत रीहिस। अकाती 1 जुलाई ले लागू होवइया नवा नियम मा अब उपभोक्ता मन ला सिर्फ ओतके दिन के सरचार्ज देबड़ लगही, जतके दिन बिल जमा करे मा देरी होए है।
नवा ब्यवस्था के तहत बिजली बिल जमा करे मा देरी होय ले 0.04 परसेंट हर दिन के हिसाब ले लेट पेमेंट सरचार्ज लगाय जाही। एखर से आखिरी तारीख के तुरंते बाद बिल जमा करइया उपभोक्ता मन ला पहिली के तुलना मा बड़ राहत मिलही।
जहां एक कोती लेट पेमेंट नियम मा राहत दे गय है, ओतहे दूसर कोती बिजली के दर मन मा घलोक बढ़ोतरी करे गय है। नवा टैरिफ के मुताबिक घरेलू उपभोक्ता मन बर बिजली दर मा 30 ले 50 पैसा प्रति यूनिट तक के बढ़त होय है। ए बढ़ती ले घरेलू उपभोक्ता मन के बिजली बिल मा हर महीना करीब 30 ले 500 रूपया तक के अड़बड़ बोझ पड़े के संसो है।
नवा टैरिफ मा कमर्शियल बिजली दर मन मा घलोक बदलाव करे गय है। एमा 20 ले 40 पैसा प्रति यूनिट तक के बढ़ोतरी करे गय है। एखर अलावा स्थानीय निकाय अउ सरकारी दफ्तर मन ला घरेलू श्रेणी मा सामिल करे गय है। ओतहे गैर-सब्सिडी वाले खेती-किसानी के पंप मन मा ऊर्जा प्रभार मा मिलइया छूट ला 40 परसेंट करे गय है।
नवा ब्यवस्था लागू होय के बाद बिजली बिल देरी ले जमा करइया उपभोक्ता मन ला राहत मिलही, काबर कि अब पूरा महीना के जुर्माना नहीं लगे। हालांकि, बिजली दर मा होय बढ़ती के असर रोज के बिजली बिल मा देखे बर मिलही। बिजली बिभाग के कहिबे है कि ए बदलाव बिलिंग प्रक्रिया ला अउ ब्यवस्थित, साफ अउ उपभोक्ता मन बर असान बनाय बर करे गय है।
