CG Education News : छत्तीसगढ़ में आरटीई के नियम बदलिस : अब नर्सरी के छुट्टी, सीधा पहली कक्षा में होही लइका मन के भरती
CG Education News : रायपुर: छत्तीसगढ़ सरकार ह गरीब अउ बीपीएल परिवार के लइका मन बर शिक्षा के अधिकार (RTE) के नियम में बड़ बदलाव कर दे हे। अब नवा सत्र ले निजी स्कूल मन में लइका मन के भरती नर्सरी या केजी-1 (Entry Class) में नई होही, बल्कि ओ मन ला सीधा कक्षा पहली में परवेस दे जाही। लोक शिक्षण संचालनालय डाहर ले भेजे गे प्रस्ताव ला शासन ह मंजूरी दे दे हे। अभी तक ये व्यवस्था रिहिस कि लइका मन ला छोटे क्लास ले ही परवेस मिलत रिहिस, फेर अब विभाग ह “एंट्री क्लास” के व्यवस्था ला पूरी तरह ले खतम कर दे हे।
CG Education News : ए फैसला के जानकारी मिलत ही ‘छत्तीसगढ़ प्राइवेट स्कूल मैनेजमेंट एसोसिएशन’ ह सरकार के विरोध करना सुरू कर दे हे। एसोसिएशन के अध्यक्ष राजीव गुप्ता के कहना हे कि आरटीई में एंट्री क्लास ले ही परवेस के नियम हे। अगर गरीब लइका मन सीधा पहली कक्षा में भरती होही, त ओ मन पढ़ाई-लिखाई में दूसर लइका मन ले पिछड़ जाहीं। काबर कि निजी स्कूल के बाकी लइका मन नर्सरी अउ केजी पढ़ के पहली में आथे, अइसन में बीपीएल लइका मन के ऊपर मानसिक दबाव बाढ़ जाही। स्कूल संचालक मन के आरोप हे कि सरकार ह नर्सरी अउ केजी के फीस बचाए बर अइसन नियम बनावत हे, जेकर ले लइका मन के भविष्य खराब हो सकत हे।
दूसर डाहर, प्राइवेट स्कूल संचालक मन ह फीस नई बाढ़े ले घलो नाराज हें। साल 2011 ले अभी तक आरटीई के फीस में एको रूपया के बढ़ोत्तरी नई करे गे हे। अभी सरकार ह पहली ले पांचवीं तक बर 7 हजार रूपया सालाना देथे, जबकि स्कूल मन के कहना हे कि एतका कम पइसा में स्कूल चलाना मुस्किल हे। स्कूल मन के मांग हे कि 2011 के बाद ले महंगाई कतका बाढ़ गे हे, ओ हिसाब ले फीस ला घलो बढ़ाना चइही। अब ये नवा नियम के बाद स्कूल संचालक अउ सरकार के बीच तकरार अउ बाढ़े के अंदेशा हे।
