छत्तीसगढ़ में अब घर बनाना होइस महँगा: सीमेंट, लोहा अउ डामर के दाम मा 25 प्रतिशत के उछाल, 90 फीसद काम परीस ठप
Construction Material Price : छत्तीसगढ़ मा घर अउ सड़क बनाये के काम मा अचानक ब्रेक लग गे हे। खाड़ी देस मन मा होवत लड़ाई अउ गैस के किल्लत के सेती अब हमर राज मा निर्माण सामग्री के दाम ह आसमान छुवत हे। सीमेंट, लोहा (स्टील), डामर अउ बिजली के तार के भाव मा 20 ले 25 प्रतिशत तक के बाढ़ आ गे हे, जेकर से आम आदमी ले लेके बड़े ठेकेदार मन तक हलाकान हें।
डामर नई मिले ले सड़क काम बंद
सबले जादा असर सड़क बनाय के काम मा दिखत हे। डामर (बिटुमेन) के भारी कमी हो गे हे, जेकर से राज मा सड़क डामरीकरण के करीब 90 प्रतिशत काम ठप पर गे हे। ठेकेदार मन करा डामर नई हे, अउ जेकर करा थोरकुन स्टॉक हे ओ मन घलो धीरे-धीरे काम करत हें। नवा काम तो सुरू घलो नई हो पावत हे।
कतेक बाढ़ीस दाम?
पिछला दू महिना मा समान मन के रेट ह कतका बाढ़ीस हे, एला देखव:
लोहा (स्टील): 55 हजार रुपिया टन ले बढ़के 65 हजार हो गे हे।
सीमेंट: 270 रुपिया के बोरी अब 300 मा मिलत हे।
डामर: 50 हजार रुपिया टन ले बढ़के सीधा 84 हजार तक पहुंच गे हे।
एखरे संग गिट्टी, टाइल्स अउ बिजली के तार घलो महँगा हो गे हें।
गैस के संकट ले उद्योग घलो परेशान
गैस सिलेंडर के कमी के सेती मिनी स्टील प्लांट अउ रोलिंग मिल मन मा उत्पादन 25 प्रतिशत तक गिर गे हे। कटिंग अउ वेल्डिंग के काम बर गैस नई मिल पावत हे, जेकर से सामान नई बन पावत हे। कुल मिलाके छत्तीसगढ़ मा इंफ्रास्ट्रक्चर के काम ह अभी पूरी तरह ले रेंग के चलत हे।
