बेटी होही त खाता म आही अतका रूपया: जानव सरकार के ये योजना के कइसे उठा सकथव फायदा

Central Government Scheme : केंद्र सरकार ह दाई मन अऊ लइका मन के नीक सेहत अऊ सुग्घर खान-पान बर ‘प्रधानमंत्री मातृ वंदना योजना’ (PMMVY) चलावत हे। ये योजना गर्भवती महिला मन बर कोनो वरदान ले कम नई हे। येकर असली मकसद हे कि गर्भ के समय दाई मन ला पोषण बर पइसा मिले अऊ समाज म बेटी मन के जनम ला बढ़ावा मिले। छत्तीसगढ़ म घलो कतकोन दाई मन येकर फायदा उठावत हें।

कतका अऊ कबे मिलही पइसा?
ये योजना म दू तरीका ले मदद मिलते। जब पहिली लइका होथे, त सरकार कुल 5,000 रूपया देथे। ये पइसा तीन कित्ता (Installment) म आथे:

पहिली कित्ता: 1,000 रूपया, फॉर्म भरके रजिस्ट्रेशन कराए म।

दूसरा कित्ता: 2,000 रूपया, जब पेट म लइका ह 6 महीना के हो जाथे अऊ डॉक्टर ले एक बार जांच हो जाथे।

तीसरा कित्ता: 2,000 रूपया, लइका के जनम के रजिस्ट्रेशन अऊ टीका (BCG) लगे के बाद।

सबले बड़े बात ये हे कि अगर कोनो परिवार म दूसरा लइका बेटी (नोनी) होथे, त दाई ला 6,000 रूपया अऊ मिलथे। अइसने करके कुल 11,000 रूपया तक के फायदा उठाए जा सकथे।

कोन भर सकथे फॉर्म?
ये योजना के फायदा पाए बर कुछु नियम हे:

महिला के उमर कम से कम 19 साल होना चाहि।

परिवार के सालाना कमाई 8 लाख रूपया ले जादा नई होना चाहि।

अगर आपके पास ई-श्रम कार्ड, बीपीएल (चाऊल) कार्ड, मनरेगा कार्ड हे या तुमन दिव्यांग हव, त अराम ले आवेदन कर सकथव।

कइसे करव आवेदन?
येकर बर आवेदन करना बहुतेच आसान हे। तुमन अपन नजदीकी आंगनबाड़ी केंद्र या स्वास्थ्य केंद्र (अस्पताल) म जाके संपर्क कर सकथव। अगर चाहव त सीधा वेबसाइट www.pmmvy.wcd.gov.in म जाके ऑनलाइन घलो फॉर्म भर सकथव। फॉर्म भरत समय आधार कार्ड, बैंक पासबुक अऊ गर्भावस्था के प्रमाण पत्र (ममता कार्ड) होना जरूरी हे।

ये योजना ले अब तक देस भर म 4 करोड़ ले जादा दाई मन ला फायदा मिले हे। ये पइसा सीधा बैंक खाता म आथे, जेकर ले दाई अऊ लइका के सेहत बर फल-फूल अऊ नीक खाना के इंतजाम हो सकथे।