सेंट्रल बैंक म ऑफिसर बने के बड़का मौका: SO के 275 पद म निकलीस भर्ती, 23 मार्च तक भरव फॉर्म
Central Bank Recruitment 2026 : नई दिल्ली। बैंकिंग क्षेत्र म सरकारी नौकरी के अगोरा करत जुवान मन बर एक नीक खबर निकल के आगू आई हे। सेंट्रल बैंक ऑफ इंडिया (CBI) ह स्पेशलिस्ट ऑफिसर (SO) के कतको पद म भर्ती बर विज्ञापन जारी करे हे। ए भर्ती के जरिए कुल 275 पद ला भरे जाही। जेन मनखे मन ए पद बर जरूरी योग्यता रखथें, ओमन बैंक के वेबसाइट म जाके ऑनलाइन आवेदन कर सकत हें।
कोन-कोन पद म होही भर्ती?
बैंक ह अपन तकनीकी विभाग ला अउ मजबूत करे बर ए वैकेंसी निकाले हे। एमां मुख्य रूप ले आईटी ऑफिसर, डेटा इंजीनियर, रिस्क मैनेजर, सॉफ्टवेयर डेवलपर, डेटा साइंटिस्ट अउ साइबर सिक्योरिटी जैसे 21 किसम के स्पेशलिस्ट पद सामिल हें। ए भर्ती ह अलग-अलग स्केल (स्केल I ले स्केल IV) बर होवत हे।
जरूरी तारीख अउ योग्यता
फॉर्म भरे के आखिरी तारीख: 23 मार्च 2026
परीक्षा के समय: अप्रैल 2026 (संभावित)
पढ़ाई-लिखाई: तकनीकी पद मन बर उम्मीदवार मन करा B.E. / B.Tech (कंप्यूटर साइंस, IT, ECE) या MCA के डिग्री होना जरूरी हे। उहें रिस्क मैनेजर अउ टैक्सेशन बर संबंधित विषय म डिग्री या CA होना अनिवार्य हे। पद के हिसाब ले अनुभव (Experience) घलो मांगे गे हे।
उम्र अउ आवेदन फीस
स्केल के हिसाब ले अधिकतम उम्र 30 ले 45 साल के बीच होना चाहिए। आरक्षित वर्ग के मन ला सरकारी नियम के मुताबिक उम्र म छूट मिलही।
सामान्य/OBC/EWS: 850 रूपया फीस।
SC/ST/दिव्यांग अउ महिला: 175 रूपया फीस।
कइसे होही चयन?
सबले पहिली ऑनलाइन लिखित परीक्षा होही, जेखर वेटेज 70% रहिथे। एमां पास होवइया मन ला इंटरव्यू (30% वेटेज) बर बलाय जाही। दूनों के नंबर ला जोड़ के फाइनल मेरिट लिस्ट तैयार करे जाही।
कइसे करव आवेदन?
इच्छुक उम्मीदवार बैंक के आधिकारिक वेबसाइट centralbank.bank.in म जाके ‘Careers’ सेक्शन म ‘Recruitment of Specialist Officers 2026’ वाले लिंक म क्लिक कर के अपन रजिस्ट्रेशन कर सकत हें। फॉर्म भरे के बाद एक प्रिंटआउट अपन करा जरूर रख लेव।
