जनगणना 2027 : 1 अप्रैल ले शुरू होही डिजिटल गिनती, पहिली बार जुटाए जाही जातिगत आंकड़ा
नई दिल्ली: केंद्र सरकार ह देस के अगली जनगणना (Census 2027) बर आधिकारिक सूचना जारी कर दिस हे। गृह मंत्रालय के मुताबिक, ए महा-अभियान के पहिली चरण 1 अप्रैल 2026 ले शुरू होही, जो 30 सितंबर 2026 तक चलही। कोरोना के सेती रुके ये काम अब नवा अउ हाई-टेक अंदाज में होही।
मोबाइल ऐप ले होही घर-घर गिनती आजाद भारत के इतिहास में पहिली बार जनगणना पूरी तरह डिजिटल होही। अब सरकारी कर्मचारी मन कागज-कलम के जगा स्मार्टफोन अउ टैबलेट लेके तुहर घर अइहें। डेटा जमा करे बर मोबाइल ऐप के प्रयोग करे जाही, जेखर निगरानी ‘सीएमएमएस’ (CMMS) पोर्टल ले होही।
पहिली बार होही जातिगत गणना ये जनगणना ह बहुत खास हे काबर कि सरकार ह अब जाति संबंधी जानकारी घलो इकट्ठा करही। स्वतंत्र भारत में ये पहिली बार होही जब जनगणना में जाति के आंकड़ा मन ला सामिल करे जाही। ये पूरा काम बर सरकार ह ₹11,718 करोड़ के बजट पास करे हे।
खुद घलो भर सकथौ जानकारी आम जनता के सुविधा बर सरकार ह ‘स्व-गणना’ (Self-Enumeration) के विकल्प दे हे। लोगन मन घर में सर्वे शुरू होय के 15 दिन पहिली खुद पोर्टल या ऐप में जाके अपन जानकारी भर सकथें। ये काम में करीब 30 लाख कर्मचारी (ज्यादातर सरकारी शिक्षक) जुटही। एखर ले मिले सटीक आंकड़ा ले भविष्य में सरकारी योजना मन ला सही ढंग ले बनाए में मदद मिलही।
