भिलाई, 3 जून 2026

छत्तीसगढ़ लोक सेवा आयोग (CGPSC) भर्ती मामला के जांच के सिलसिला म केंद्रीय अन्वेषण ब्यूरो (CBI) ह बुधवार के भिलाई म दो अलग-अलग जघा म जांच के कार्रवाई करिस। मिले जानकारी के मुताबिक, सीबीआई के टीम ह पूर्व प्रशासनिक अधिकारी जीवन किशोर ध्रुव के घर पहुंच के दस्तावेज अउ दूसर कागजात मन के जांच-पड़ताल करिस।

सूत्र मन के कहना हे कि सीबीआई के टीम ह बिहनिया सुरक्षा बल के जवान मन के साथ ओकर घर पहुंचिस अउ कतको घंटा तक दस्तावेज मन ला खंगालत रहिस। बताय जावत हे कि जीवन किशोर ध्रुव ह पहिली दुर्ग जिला म परिवहन विभाग म अधिकारी रह चुके हे अउ छत्तीसगढ़ लोक सेवा आयोग (CGPSC) म सचिव पद के जिम्मेदारी घलो संभार चुके हे। ए जांच ला सीजीपीएससी भर्ती मामला ले जोड़ के देखे जावत हे, हालांकि ए विषय म सीबीआई कोति ले अभी तक कोई आधिकारिक बयान जारी नहीं करे गे हे।

एकर साथ च, नेहरू नगर के रहे वइया अनिल अग्रवाल के घर म घलो जांच एजेंसी के टीम पहुंचिस। अनिल अग्रवाल के नाम भारतमाला परियोजना ले जुड़े मामला म आगू आय के गोठ चलत हे। टीम कोति ले उहां घलो जरूरी दस्तावेज अउ कागजात मन के जांच करे के जानकारी मिले हे। दोनों मामला म जांच एजेंसी ह दस्तावेज अउ तथ्य मन के परीक्षण करत हे। अफसर मन के कहना हे कि अभी जांच के प्रक्रिया चलत हे।