बजट 2026: निर्मला सीतारमण 9वीं बार पेश करहीं बजट, मिडिल क्लास अउ किसान मन ल भारी उम्मीद
नई दिल्ली। आज 1 फरवरी के वित्त मंत्री निर्मला सीतारमण लगातार 9वीं बार केंद्रीय बजट पेश करके संसदीय इतिहास म एक नवा रिकॉर्ड बनाए बर जावत हें। बजट पेश करे के पहिली वित्त मंत्री ह राष्ट्रपति भवन पहुंच के राष्ट्रपति द्रौपदी मुर्मू ले भेंट करीन अउ बजट पेश करे के अनुमति लीन। अब सुबह 11 बजे लोकसभा म बजट भाषण शुरू होही।
ए बार के बजट ले छत्तीसगढ़ समेत पूरा देश के मिडिल क्लास अउ किसान मन ल बड़े उम्मीद हें। अंदेशा जताए जावत हे कि नवा टैक्स रिजीम म स्टैंडर्ड डिडक्शन के सीमा ल बढ़ा के 1 लाख रुपया करे जा सकत हे, जेकर ले 13 लाख तक के आय टैक्स-फ्री हो जाही। ओही डहार, पीएम-किसान सम्मान निधि के राशि ल 6 हजार ले बढ़ा के 9 हजार रुपया सालाना करे के संभावना हे।
वित्त मंत्री निर्मला सीतारमण आज तमिलनाडु के पारंपरिक कांजीवरम साड़ी पहिर के संसद पहुंची हें। ए बजट म रेलवे बर अब तक के सबले बड़े फंड अउ 300 ले जादा नवा अमृत भारत अउ वंदे भारत ट्रेन मन के घोषणा हो सकत हे। संगे-संग, आयुष्मान भारत योजना के तहत सियान मन के उम्र सीमा ल 70 ले घटा के 60 साल करे जा सकत हे।
सोना अउ चांदी के शौकीन मन बर घलो नीक खबर आ सकत हे, काबर कि इम्पोर्ट ड्यूटी घटे ले एकर कीमत म कमी आए के उम्मीद हे। बता दन कि एक दिन पहिली पेश करे गए इकोनॉमिक सर्वे म देश के अर्थव्यवस्था ल मजबूत बताए गे हे, जेला देखत ए बजट म विकास अउ रोजगार ऊपर विशेष जोर रहे के आस हे।
