BREAKING : भारतमाला प्रोजेक्ट मुआवजा घोटाला म ED के बड़े कार्रवाई, रायपुर अउ महासमुंद के 9 ठिकानों म छापा
BREAKING : रायपुर/महासमुंद: छत्तीसगढ़ म भ्रष्टाचार के खिलाफ ईडी (ED) ह एक बार फिर ले बड़े हड़कंप मचा दे हे। सोमवार के बिहनिया-बिहनिया प्रवर्तन निदेशालय के टीम ह भारतमाला प्रोजेक्ट मुआवजा घोटाला के मामला म रायपुर अउ महासमुंद म छापा मारे हे। जानकारी के मुताबिक, ईडी के 7 अलग-अलग टीम मन ह एक साथ 9 ठिकानों म दबिश दीन, जेकर ले रसूखदार मन म हड़कंप मच गे हे।
BREAKING : कोन-कोन हवय ED के रडार म?
ये छापेमारी कारोबारी हरमीत खनूजा अउ ओकर सहयोगी मन के ठिकानों म चलत हे। महासमुंद म मशहूर कारोबारी जशबीर सिंह बग्गा (होंडा शोरूम के मालिक) के बसंत कॉलोनी वाले घर म तको ईडी के टीम ह धमक दे हे। बिहनिया ले ही अधिकारी मन घर के घेराबंदी करके कागजात अउ डिजिटल डिवाइस मन के जांच करत हें।
का आय ये पूरा मामला?
बता दन कि भारतमाला परियोजना के तहत रायपुर ले विशाखापट्टनम तक सड़क के निर्माण होवत हे। एमा रायपुर ले विशाखापट्टनम तक फोरलेन अउ दुर्ग ले आरंग तक सिक्सलेन सड़क बनना हे।
ए सड़क बर सरकार ह कतको किसान मन के जमीन अधिग्रहित करे रहिस।
आरोप हे कि किसान मन के मुआवजा के करोड़ों रुपिया म बड़े घोटाला होय हे।
असली किसान मन ल मुआवजा नइ मिलिस अउ बिचौलिया मन अधिकारी मन संग मिलके करोड़ों रुपिया डकार गे हें।
विधानसभा म गूंजिस मामला
ये मुद्दा ल विधानसभा के बजट सत्र 2025 म नेता प्रतिपक्ष चरण दास महंत ह जोर-शोर ले उठाए रहिस। ओकर बाद ही जांच के पहिया घूमिस अउ अब ईडी ह ए मामला म एंट्री मार दे हे।
अधिकारी मन के जांच जारी: अभी ईडी के टीम ह दस्तावेज मन ल खंगालत हे। कतको बैंक खाता अउ बेनामी संपत्ति के पता चले के उम्मीद हे। ये छापेमारी म संझा तक कतको बड़े खुलासा हो सकत हे।
Related Posts
