पैरोल म बाहिर आय बीजेपी पार्षद के गोली मार के हत्या, इलाका म सनसनी
MP News : दतिया। मध्यप्रदेश के दतिया म मंगलवार के ओ बखत हड़कंप मच गे, जब कोतवाली थाना क्षेत्र के सेवड़ा चुंगी करा बीजेपी पार्षद कल्लू कुशवाहा के सरेआम गोली मार के हत्या कर दी गिस। बताय जावत हे कि जुन्ना रंजिश के सेती ए वारदात ला अंजाम दे गे हे। हमलावर मन ह पार्षद ऊपर ओ बखत ताबड़तोड़ फायरिंग कर दिन जब ओ ह इलाका म मौजूद रहिस, जेखर से ओखर मउका म ही मौत हो गे।
घटना के जानकारी मिलत ही सहर म सनसनी फैल गे अउ भारी संख्या म स्थानीय लोगन अउ परिवार वाले मन मउका म पहुँच गिन। सूचना पाके पहुँची पुलिस ह स्थिति ला सँभालिस अउ लास ला कब्जा म लेके पोस्टमार्टम बर अस्पताल भेजवा दीस हे। बता दन कि मृतक कल्लू कुशवाहा के पिछला रिकार्ड घलो आपराधिक रहिस हे। ओला हत्या के एक जुन्ना मामला म अदालत ह आजीवन कारावास के सजा सुनाय रहिस अउ ओ ह थोरिक दिन पहिली ही जेल ले पैरोल म बाहिर आय रहिस।
अभी पुलिस ह हमलावर मन के खोज-खबर तेज कर दीस हे, फेर अब तक आरोपी मन के कोनो पता नइ चल पाय हे। वारदात के बाद ले परिवार वाले मन म भारी गुस्सा हे अउ एहतियात के तौर म इलाका म पुलिस बल तैनात करे गे हे। सुरुवाती जाँच म पुलिस एला आपसी रंजिश के मामला मान के चलत हे।
