भाजपा कोर ग्रुप ले बड़े नेता मन बाहिर: दीपक बैज कहिन- बृजमोहन संग भाजपा करत हे सौतेला व्यवहार

BJP Core Group : रायपुर। छत्तीसगढ़ भाजपा के नवा कोर ग्रुप ले दिग्गज नेता मन ल बाहिर करे के बाद अब राजनीति म गरमा-गरमी सुरु होगे हे। पीसीसी चीफ दीपक बैज ह भाजपा ऊपर निशाना साधत कहिन कि पार्टी म गुटबाजी चरम म हे। ओमन आरोप लगाइन कि भाजपा ह बृजमोहन अग्रवाल संग सौतेला बेय्वहार करत हे। ए बयान ऊपर पलटवार करत सांसद बृजमोहन अग्रवाल ह कहिन कि जब तक ओमन राजनीति म सक्रिय हें, कोनो ओला किनारे नई कर सके।

भाजपा के नवा कोर ग्रुप ऊपर सियासत

असल म, मंगलवार के कुशाभाऊ ठाकरे परिसर म कोर ग्रुप के बइठक होय रिहिस। एमा फैसला लेवत सांसद बृजमोहन अग्रवाल, मंत्री रामविचार नेताम अउ पहिली के विधानसभा अध्यक्ष गौरीशंकर अग्रवाल ल ग्रुप ले बाहिर कर दे गे हे। एला लेके कांग्रेस अध्यक्ष दीपक बैज ह कहिन कि बृजमोहन अग्रवाल पार्टी के बड़े अउ अनुभवी नेता हें, ओमन ल नजरअंदाज करना भाजपा के गुटबाजी ल उजागर करथे।

सांसद बृजमोहन के पलटवार: ‘ये सामान्य प्रक्रिया आय’

दीपक बैज के बयान के जवाब देवत सांसद बृजमोहन अग्रवाल ह कहिन कि भाजपा कोर कमेटी म कोनो ल रखना या निकालना एकदम सामान्य प्रक्रिया आय। ओमन कहिन, “मैं पिछले दस साल ले कोर कमेटी के हिस्सा रहेंव। मोर संग कोनो सौतेला बेय्वहार नई कर सके। मैं जब तक सक्रिय हंव, तब तक कोनो मोला किनारे नई कर सकय।”

पेट्रोल-डीजल अउ आर्थिक संकट ऊपर घलो घमासान

वित्त मंत्री ओपी चौधरी के काफिला अउ सरकारी गाड़ी मन म पेट्रोल-डीजल के खपत कम करे के बात ऊपर घलो दीपक बैज ह हमला बोलिस। बैज ह कहिन कि ये बड़ दुर्भाग्यजनक हे कि सरकार अब समीक्षा करे के बात करत हे। ओमन कहिन कि सरकार ल ए मामला म सर्वदलीय बइठक बुलाना चाहिये अउ विपक्ष ले घलो चरचा करना चाहिये।

एकर जवाब म सांसद बृजमोहन अग्रवाल ह कहिन कि कांग्रेस करा अब कोनो मुद्दा नई बांचे हे। कांग्रेस ल पहिली अपन संगठन के चिंता करना चाहिये, ओकर बाद हमर बारे म सोचना चाहिये।