रतनपुर थाना मा भाजपा कार्यकर्ता ले मारपीट, वीडियो वायरल होय के बाद ASI सस्पेंड, FIR घलो दर्ज
Ratanpur Police Station : बिलासपुर। छत्तीसगढ़ के बिलासपुर जिला ले एक बड़े खबर आगू आय हे, जिहां रतनपुर थाना मा केस के जानकारी ले बर पहुंचे भाजपा कार्यकर्ता ले मारपीट करे गे हे। बताय जावत हे कि ASI ह कार्यकर्ता के कनपटी मा 15-20 झापड़ (थप्पड़) जड़ दीस। ए घटना के वीडियो सोशल मीडिया मा जम्मों डाहर वायरल होवत हे। खास बात ए हे कि थाना के ही कोनो पुलिस वाले ह ए वीडियो ल बना के जारी करे हे। मामला गड़बड़ाय के बाद SSP रजनेश सिंह ह ASI दिनेश तिवारी ल सस्पेंड कर दे हे, अउ पीड़ित के शिकायत मा ASI के खिलाफ FIR घलो दर्ज करे गे हे।
जानव का हे पूरा मामला जानकारी के मुताबिक, रतनपुर के बनियापारा के रहने वाला भाजपा कार्यकर्ता विनोद जायसवाल 12 अप्रैल के अपन कोनो जुन्ना केस के जानकारी ले बर थाना पहुंचे रिहिस। मंझनिया कुन 2.30 बजे विनोद के मुलाकात ASI दिनेश तिवारी ले होईस। विनोद ह अपन केस के बारे मा पूछीस अउ जांच रिपोर्ट ल कोर्ट मा पेश करे बर बिनती करिस। बस एतकी बात मा ASI ह खिसिया गे अउ मारपीट सुरु कर दीस।
विनोद जायसवाल ह बताइस कि ASI ह ओला गारी-गुप्ती देवत हुए 15 ले 20 झापड़ मारिस। जब ए घटना होईस, तब थाना मा अउ घलो पुलिस मन मौजूद रिहिन। मारपीट करत बखत ASI ह ओला धमकी घलो दीस कि “तूं कतका बड़े नेता हस, तोर नेतागिरी ल निकाल दूहूं, तोला जेल भेज दूहूं।” ए मामला मा ए घलो आरोप हे कि ASI ह कोर्ट मा रिपोर्ट पेश करे के बदला मा पइसा के मांग घलो करत रिहिस। अब पुलिस ह ए पूरा मामला के जांच सुरु कर दे हे। अधिकारी मन के कहना हे कि दोषी पाय जाय मा ASI के खिलाफ अउ कड़ा कानूनी कार्रवाई करे जाही।
