Bilaspur Fraud Case : प्राइवेट स्कूल संचालक ले मकान बेचे के नाम म 40 लाख के ठगी….

Bilaspur Fraud Case : बिलासपुर (छत्तीसगढ़): बिलासपुर शहर म धोखाधड़ी के एक बड़े मामला सामने आए हे, जिहाँ एक प्राइवेट स्कूल के संचालक ले मकान बेचे के नाम म 40 लाख रूपिया के ठगी कर दे गिस। शिकायत के बाद पुलिस ह धोखाधड़ी के केस दर्ज करके दू आरोपी मन ल गिरफ्तार कर लिस। ये पूरा मामला सरकंडा थाना क्षेत्र के आय।

Bilaspur Fraud Case : एसईसीएल कर्मचारी बताके करिस सौदा

जानकारी के मुताबिक, सूर्या विहार म रहे वाला प्राइवेट स्कूल के संचालक, अजीत शुक्ला, के जान-पहचान दिनेश प्रताप सिंह ले होइस। दिनेश ह अप्रैल 2024 म अजीत ल भास्कर प्रसाद त्रिपाठी ले मिलवाइस।

भास्कर ह अपन-आप ल एसईसीएल कोरबा के कर्मचारी बताइस अउ कहिस के ओकर मकान विवेकानंद नगर, मोपका म बेचे बर रखे हे। मकान देखे के बाद दूनी पक्ष के बीच 26 अप्रैल 2024 के इकरारनामा होइस, जेमा 3 महीना म रजिस्ट्री करे के बात तय होइस।

अजीत शुक्ला ह भास्कर ल 36 लाख रूपिया ऑनलाइन दे दिस। फेर तय समय पूरा होए के बाद घलो भास्कर ह रजिस्ट्री नइ करइस। बाद म पता चलिस के आरोपी मन ह 40 लाख रूपिया के फर्जी इकरारनामा घलो बना डारिन।

बैंक म गिरवी रखे मकान के सौदा

शिकायतकर्ता ल बाद म जानकारी मिलिस के जे मकान के सौदा होए रिहिस, ओ ह पहिली ले बैंक म बंधक (गिरवी) रखे रिहिस। आरोपी मन ह ये जरूरी जानकारी ल छिपाइन अउ ठगी करिन।

अजीत शुक्ला के शिकायत के बाद पुलिस ह तुरंत धोखाधड़ी के केस दर्ज करिस अउ दू आरोपी भास्कर प्रसाद त्रिपाठी अउ दिनेश प्रताप सिंह ठाकुर ल गिरफ्तार कर लिस।

सिविल लाइन बिलासपुर के सीएसपी निमितेष सिंह ह बताइस के, दूनी आरोपी मन ल कोर्ट म पेश करे गिस, जिहाँ ले ओ मन ल न्यायिक रिमांड म जेल भेज दे गए हे।