भारतमाला घोटाला : जमीन कारोबारी गोपाल गांधी अउ भूपेंद्र चंद्राकर के ठिकाना मन में ईडी के छापा
रायपुर। 27 अप्रैल : भारतमाला परियोजना घोटाला मामला में प्रवर्तन निदेशालय (ED) ह आज बड़े कार्रवाई करे हे। जमीन कारोबारी गोपाल गांधी अउ ओखर ले जुड़े मनखे मन के आधा दर्जन ले जादा ठिकाना मन में ईडी ह छापा मारे हे।
जानकारी के मुताबिक, ईडी के 13 अफसर मन के टीम ए कार्रवाई ला करत हें। गोपाल गांधी के अभनपुर वाले घर अउ ऑफिस में बिहनिया ले ही टीम पहुँच गे रिहिस। अधिकारी मन अभी कागज़-पतर अउ डिजिटल सबूत मन के जाँच करत हें।
ए छापा में सिरिफ गोपाल गांधी ही नहीं, बल्कि पूर्व मंत्री अउ भाजपा विधायक अजय चंद्राकर के चचेरे भाई भूपेंद्र चंद्राकर के ठिकाना मन में घलो दबिश दे गे हे। भूपेंद्र चंद्राकर ऊपर आरोप हे कि ओ ह अपन करीबी मन ला अलग-अलग तहसील मन में भारतमाला घोटाला के करोड़ों रुपिया मुआवजा देवाए हे।
का हे पूरा मामला?
भारतमाला परियोजना के तहत छत्तीसगढ़ में जमीन मुआवजा ला लेके बड़े घोटाला होय के गोठ आगू आए हे। रायपुर-विशाखापत्तनम इकोनॉमिक कॉरिडोर बर जमीन अधिग्रहण के बखत करीब 500 करोड़ रुपिया ले जादा के धांधली के आरोप हे।
अधिकारी अउ दलाल मन के मिलीभगत
जाँच में पता चले हे कि खेती वाले जमीन ला कागज़ में हेर-फेर करके गैर-कृषि जमीन बता दे गे रिहिस, ताकि मुआवजा के रकम कई गुना बढ़ जाए। ए खेल में राजस्व विभाग के अधिकारी (एसडीएम, तहसीलदार, पटवारी) अउ जमीन दलाल मन मिले रिहिन। एक ही जमीन ला छोटे-छोटे टुकड़ा में बाँट के अलग-अलग मनखे मन ला मुआवजा देवाए गे हे।
मामला में ईडी ह पहिली घलो रायपुर अउ महासमुंद में छापा मार के करोड़ों के संपत्ति जब्त करे हे। अभी तक ए मामला में तत्कालीन एसडीएम निर्भय साहू अउ कतको अधिकारी मन ला गिरफ्तार करे जा चुके हे। ईओडब्ल्यू ह ए मामला में 10 झन के खिलाफ पहली चार्जशीट घलो पेश कर दे हे।
