Bastar Naxal Encounter : सुकमा अऊ बीजापुर म नक्सलवाद ऊपर करारा प्रहार: मुठभेड़ म 14 नक्सली ढेर, हथियार अऊ शव बरामद
Bastar Naxal Encounter : सुकमा/बीजापुर: छत्तीसगढ़ के बस्तर संभाग म शनिवार के माओवादी मन के खिलाफ जवान मन ह बड़े प्रहार करिन हे। बीजापुर अऊ सुकमा के इलाका म नक्सली अऊ जवान मन के बीच जबरदस्त मुठभेड़ होईस। सुरक्षाबल मन के दूनों कार्रवाई म बड़े सफलता मिले हे। बीजापुर म दू नक्सली मन के शव अऊ हथियार बरामद करे गे हे, त सुकमा मुठभेड़ म 12 नक्सली मन ला ढेर कर दे गे हे।
Bastar Naxal Encounter : सुकमा मुठभेड़ म जवान मन ला मिलीस बड़े सफलता, 12 नक्सली ढेर
सुकमा के किस्टाराम इलाका म नक्सली मन ऊपर डीआरजी (DRG) के जवान मन ह कहर बनके टूटीन। सर्च ऑपरेशन के दौरान होय ए मुठभेड़ म जवान मन ला बड़े सफलता मिलीस हे, जेमा कई झन नक्सली मन ला मार गिराए गे हे। खबर हे कि ए मुठभेड़ म डीवीसीएम (DVCM) मंगडु घलो मारे गे हे। जानकारी के मुताबिक, किस्टाराम म होय ए भिड़ंत म कुल 12 नक्सली ढेर हो हें। मौका ले जम्मो 12 नक्सली मन के शव के संग एक ए.के. 47 अऊ इंसास राइफल घलो बरामद करे गे हे।
बीजापुर मुठभेड़ म 2 नक्सली ढेर, शव अऊ हथियार बरामद
नक्सल प्रभावित क्षेत्र बीजापुर म शनिवार बिहनिया ले सुरक्षा बल अऊ नक्सली मन के बीच मुठभेड़ जारी रिहिस। डीआरजी जवान मन ह दू माओवादी मन ला मार गिराए हें अऊ दूनों के शव ला बरामद कर ले गे हे। इलाका म अभी घलो जवान मन के सर्च अभियान जारी हे।
जानकारी के मुताबिक, बीजापुर जिला के दक्षिण इलाका म सशस्त्र माओवादी मन के होय के खबर मिले रिहिस, जेकर बाद जवान मन ह सर्च ऑपरेशन सुरू करिन। जब डीआरजी के टीम अभियान म निकलिंस, त माओवादी मन संग ओकर मुठभेड़ हो गे। बिहनिया 5 बजे ले रुक-रुक के गोलीबारी चलत रिहिस। बीजापुर एसपी डॉ. जितेन्द्र यादव ह ए घटना के पुष्टि करे हें।
