खूंखार महिला नक्सली ACM रूपी ढेर, बड़े कैडर के आखिरी माओवादी के खात्मा
Bastar Naxal Encounter : कांकेर। छत्तीसगढ़ के बस्तर इलाका ले नक्सलवाद के सफाया करे बर सुरक्षाबल मन ल एक ठन अउ बड़े कामयाबी मिली हे। कांकेर जिला के छोटेबेठिया इलाका मा जवान मन अउ नक्सली मन के बीच जबरदस्त मुठभेड़ होइस, जेमा जवान मन ह खूंखार महिला नक्सली ACM रूपी ल मार गिराय हें। बताय जावत हे कि रूपी ए इलाका मा बड़े कैडर के आखिरी नक्सली बची रहिस, जेकर मरे ले अब माओवादी संगठन ल तगड़ा झटका लगे हे। एसपी निखिल राखेचा ह ए मुठभेड़ के पुष्टि करे हें।
मिली जानकारी के मुताबिक, सुरक्षाबल के जवान मन आज बिहनिया सर्चिंग बर निकले रहिन। जब जवान मन छोटेबेठिया के जंगल डहर पहुँचीन, तहाँ पहिलु ले लुकाय नक्सली मन अचानक फायरिंग शुरू कर दिन। जवान मन घलो फउरन मोर्चा सँभालिन अउ मुँहतोड़ जवाब दिन। कतको बेर तक चले ए लड़ाई मा जवान मन ल भारी पड़त देख बाकी नक्सली मन जंगल के आड़ लेके भाग खड़े होइन। जब जवान मन ह मौका के तलाशी लिन, त ओ मन ल एक महिला नक्सली के लाश मिलीस, जेकर पहचान ACM रूपी के रूप मा होय हे।
ए बड़े सफलता के बाद सुरक्षाबल के जवान मन ह ओ इलाका ल चारों डहर ले घेर लिहें हें अउ जंगल मा सर्च ऑपरेशन ल अउ तेज कर दे गे हे। पुलिस के मानना हे कि ए मुठभेड़ मा कतको अउ नक्सली मन ल घलो गोली लगे होही। बस्तर ले बड़े नक्सली लीडर मन के सफाया करे के दिशा मा एला एक बड़े जीत माने जावत हे।
