बैंक कर्मचारी ह सरकारी खजाना ले उड़ाईस 26.87 लाख, बड़े अधिकारी मन के आईडी के करिस दुरुपयोग
Chhattisgarh News : मुंगेली। छत्तीसगढ़ के मुंगेली ले एक ठन बड़े धोखाधड़ी के मामला आगू आई हे, जहां सरकारी खजाना मा सेंधमारी करे गे हे। कलेक्ट्रेट के पर्यावरण अधोसंरचना विकास उपकर खाता ले लगभग 26.87 लाख रुपय के हेराफेरी करे गे हे। ए खुलासा के बाद जिला प्रशासन अउ बैंक प्रबंधन मा हड़कंप मच गे हे।
ए पूरा मामला सेंट्रल बैंक ऑफ इंडिया के मुंगेली शाखा के आय। जब अपर कलेक्टर जीएल यादव ह बैंक ला नोटिस जारी करिस, तब पता चलिस कि खाता ले जतका घलो लेनदेन होय हे, ओला कलेक्ट्रेट कार्यालय ह मंजूर नहीं करे रिहिस। बैंक ह मानिस हे कि ओखर कर्मचारी (CSA) टिकेश कुमार ह भीतर के वाउचर अउ अधिकारी मन के गोपनीय आईडी के गलत इस्तेमाल करके ए बड़े रकम ला निकाल डारे रिहिस।
जैसेच ए मामला के पता चलिस, बैंक ह गबन करे गे पूरा पैसा ला वापस खाता मा जमा कर ददिस हे। आरोपी कर्मचारी के जवाब सही नहीं पाय जाय मा ओला सस्पेंड (निलंबित) कर दे गे हे अउ रायपुर क्षेत्रीय कार्यालय डाहर ले जांच शुरू कर दे गे हे। फेर, जिला प्रशासन बैंक के ए कार्रवाई ले खुश नइ हे। प्रशासन के कहना हे कि सरकारी पैसा के सुरक्षा मा ए भारी लापरवाही आय। अभी कागज मन के जांच चलत हे अउ अधिकारी मन कहिथें कि दोषी मन के खिलाफ कड़ी कानूनी कार्रवाई करे जाही।
