बलौदाबाजार हिंसा मामला : सुप्रीम कोर्ट ह राज्य सरकार ला जारी करिस नोटिस
Balodabazar Violence : बलौदाबाजार हिंसा अउ आगजनी के मामला मा सुप्रीम कोर्ट मा सुनवई होइस। शीर्ष अदालत ह विशेष अनुमति याचिका (SLP) मा सुनवई के बाद छत्तीसगढ़ सरकार ला नोटिस जारी करके जबाब पेस करे के निरदेस देहे हे। एसएलपी मा अगला सुनवई बर सुप्रीम कोर्ट ह 17 जुलाई के तारीख तय करे हे।
हाईकोर्ट ले जमानत याचिका हो चुके हे खारिज:
बतावन् कि बलौदाबाजार मा हुए बहुचर्चित हिंसा अउ आगजनी मामला के आरोपी अमित बघेल, अजय यादव अउ दिनेश कुमार वर्मा के जमानत याचिका ला छत्तीसगढ़ हाई कोर्ट ह खारिज कर दे रहीस। एकर बाद अजय यादव ह सुप्रीम कोर्ट मा याचिका लगाके जमानत के गुहार लगाइस, जेमा अदालत ह राज्य सरकार ले जबाब मांगे हे।
छत्तीसगढ़ हाईकोर्ट के जस्टिस नरेंद्र कुमार व्यास के सिंगल बेंच ह 19 मई 2026 ला मनके जमानत याचिका ला खारिज करे रहीस। सुनवई के बेरा कोर्ट ह कहे रहीस कि आरोपी अमित बघेल अउ अजय यादव छत्तीसगढ़ क्रांति सेना के पदाधिकारी एंव, ओमन ऊपर 7 ले 8 हजार लोगन के भीड़ ला भड़काए, सरकारी संपत्ति ला नोकसान पहुंचाय अउ पुलिस बल ऊपर जानलेवा हमला करे के गंभीर आरोप हे।
हिंसा मा 13 ले 15 करोड़ के सरकारी संपत्ति ला पहुंचे रहीस नोकसान:
ये हिंसा के कारन बलौदाबाजार-भाटापारा जिला मा सांति व्यवस्था बुरी तरह प्रभावित होगे रहीस अउ लगभग 13 ले 15 करोड़ रूपिया के सरकारी संपत्ति के नोकसान होय रहीस। अमित बघेल के खिलाफ 17, अजय यादव के खिलाफ 13 अउ दिनेश कुमार वर्मा के खिलाफ एक आपराधिक मामला चलत हे। हाईकोर्ट के ये फैसला ला चुनौती देवत हुए आरोपी मन ह सुप्रीम कोर्ट मा एसएलपी दायर करे रहीन, जेमा अब राज्य सरकार ले जबाब मांगे गे हे।
जानव का ए पूरा मामला (Balodabazar Violence):
बता देवन् कि 15 अउ 16 मई 2024 के रात कूंछ असामाजिक तत्व मन ह गिरौधपुरी धाम मा सतनामी समाज के धार्मिक स्थल के पूज्य जैतखाम मा तोड़फोड़ करे रहीन। पुलिस ह तीन आरोपी मन ला गिरफ्तार घलो करे रहीस, पर समाज के लोगन मन ये कार्रवाई ले खुस नहीं रहीन अउ न्यायिक जांच के मांग करत रहीन। एकर बाद गृहमंत्री विजय शर्मा ह न्यायिक जांच के घोेसना घलो करिन।
पर 10 जून ला जैतखाम मा तोड़फोड़ के विरोध मा हजारों लोगन मन कलेक्ट्रेट करा जुरिन अउ जम्मों हंगामा करिन, जेकर बाद परदरसन ह हिंसक होगे। उपद्रवी मन ह कलेक्टोरेट अउ एसपी आफिस ला आग के सुपुर्द कर दिन। ये हिंसक घटना मा सरकारी संपत्ति मन ला 12.53 करोड़ रूपिया के भारी नोकसान पहुंचे रहीस। प्रशासन ह कार्रवाई करत हुए 43 मामला मा 187 लोगन मन ला गिरफ्तार करे रहीस।
