ayush pandey india a selection : रायपुर। छत्तीसगढ़ के क्रिकेट बर आज अब्बड़ गर्व के दिन आय। हमर राज्य के युवा बल्लेबाज आयुष पांडे के चयन भारत ‘ए’ टीम में श्रीलंका दौरा बर होगे हे। भारतीय क्रिकेट कंट्रोल बोर्ड (BCCI) ह श्रीलंका में होइया मल्टी-डे मैच मन बर भारत ‘ए’ टीम के एलान करे हे, जेमा छत्तीसगढ़ के ए होनहार बल्लेबाज ला घलो मौका मिलिस हे।

आयुष के चयन के खबर आतिच पूरा प्रदेश के क्रिकेट जगत में खुसी के लहर दौड़गे हे। घरेलू क्रिकेट में लगातार धमाकेदार प्रदर्शन के इनाम ओला भारत ‘ए’ टीम में जगह के रूप में मिलिस हे। क्रिकेट के जानकार मन एला ओकर करियर के सबले बड़े मौका मानत हें।

घरेलू क्रिकेट में लगातार देखाइस दम

22 बछर के बांया हाथ के सलामी बल्लेबाज (ओपनर) आयुष पांडे पिछले कुछ साल ले घरेलू क्रिकेट में लगातार गजब के खेल देखात हें। रणजी ट्रॉफी में ओकर बल्लेबाजी ह चयनकर्ता मन के ध्यान अपन कोति खींचे रहिस।

प्रथम श्रेणी क्रिकेट में ओमन अभी तक 19 मैच के 34 पारी में 1430 रन बनाय हें, जेमा ओकर औसत 47.66 के रहीस हे। ए दौरान ओकर बल्ला ले 4 शतक और 5 अर्धशतक निकलिस हे। प्रथम श्रेणी क्रिकेट में ओकर सबले बड़े स्कोर 211 रन आय, जो ये बताथे कि ओमन लंबी पारी खेले के दम रखथें।

दिल्ली के खिलाफ 183 रन के पारी रहीस खास

अभी हाल ही में रणजी ट्रॉफी में दिल्ली के खिलाफ खेले गये 183 रन के शानदार पारी ला ओकर चयन के सबले बड़े कारन माने जात हे। ए पारी में आयुष ह धीरज और आक्रामकता के गजब संतुलन देखाय रहीस।

एकर अलावा विजय हजारे ट्रॉफी में घलो ओमन अपन दम देखाइन। ओमन 78 और 49 रन के जरूरी पारी खेलके टीम ला जिताय में बड़े योगदान दे रहीन।

CCPL में रचिस इतिहास

आयुष पांडे ए दिन मन छत्तीसगढ़ क्रिकेट प्रीमियर लीग (CCPL) सीजन-3 में बिलासपुर बुल्स के कप्तानी करत हें। बतौर ओपनर ओमन टीम ला लगातार मजबूत शुरुआत देवावत हें।

हाल ही में बस्तर बायसन के खिलाफ ओमन 147 रन के विस्फोटक पारी खेल रहीन। अपन ए यादगार पारी में ओमन 13 चौका और 11 छक्का जड़िन। ये CCPL के इतिहास में अब तक के सबले बड़े व्यक्तिगत स्कोर आय। एकर अगू के मैच में घलो ओमन 51 रन के अर्धशतकीय पारी खेलके अपन बढ़िया फॉर्म ला जारी रखिन।

युवा खिलाड़ी मन ले सजे हे भारत ‘ए’ टीम

श्रीलंका दौरा बर घोषित भारत ‘ए’ टीम में कतको उभरत हुए खिलाड़ी मन ला मौका दे गिस हे। टीम के कप्तानी ध्रुव जुरेल ला सोंपे गे हे, जबकि देवदत्त पडिक्कल ला उपकप्तान बनाय गे हे।

एकर अलावा टीम में साई सुदर्शन, ऋतुराज गायकवाड़, एन. जगदीशन, हर्ष दुबे, यश ठाकुर, अंशुल कंबोज और शैक रशीद जैसे प्रतिभावान खिलाड़ी मन ला घलो सामिल करे गे हे। चयनकर्ता मन के मानना हे कि ये दौरा युवा खिलाड़ी मन ला अंतरराष्ट्रीय स्तर के अनुभव देवाय में बड़े काम आही।

छत्तीसगढ़ क्रिकेट बर बड़े उपलब्धि

आयुष पांडे के भारत ‘ए’ टीम में चयन छत्तीसगढ़ क्रिकेट के बढ़त नाम और प्रतिभा के सुग्घर प्रमाण आय। पिछले कुछ बछर में राज्य के खिलाड़ी मन घरेलू क्रिकेट में लगातार बढ़िया प्रदर्शन करे हें और अब राष्ट्रीय स्तर में अपन पहिचान बनावत हें।

क्रिकेट प्रेमी, खेल संगठन और पुरना खिलाड़ी मन ह आयुष ला ए बड़े सफलता बर बधाई दे हें। सबो ला उम्मीद हे कि ओमन श्रीलंका दौरा में घलो अपन ए फॉर्म ला जारी रखिहें और आने वाला समय में भारतीय सीनियर टीम के घलो कपाट खटखटाहिहें।