मौत के मांझा ऊपर रोक जागरुकता : चाइनीज डोर ला लेके घर-घर जाही पुलिस, जानव का हे पूरा मामला
भोपाल। मकर संक्रांति के तिहार ले पहिली मध्य प्रदेश के राजधानी भोपाल म ‘मौत के डोर’ यानी चाइनीज मांझा ला रोके बर पुलिस अउ प्रशासन ह कमर कस ले हे। सहर म जानलेवा हादसा मन ला रोके बर अब सिरिफ पकड़ा-धकरी नई होही, बल्कि भोपाल पुलिस ह ‘डोर-टू-डोर’ (घर-घर) अभियान चला के मनखे मन ला जागरूक करही। एकर बर अलग-अलग टीम बनाए गे हे, जेहा पारा-मुहल्ला म जाके मनखे मन ला चाइनीज मांझा के इस्तेमाल नई करे के सलाह दिही।
इंदौर के दर्दनाक घटना के बाद जागी पुलिस
राजधानी म ए सख्ती काली रविवार के इंदौर म होय एक ठन बड़ दुर्घटना के बाद बढ़गे हे। इंदौर म चाइनीज मांझा के सेती एक झन मनखे के गला कट गे अउ ओकर मौत हो गे। पिछिले एक-दू साल म भोपाल अउ आसपास के इलाका म घलो अइसने कतको घटना आगू आ चुके हे, जेमा रद्दा म चलइया मनखे अउ अगास म उड़इया चईई-चिरई मन ला भारी चोट पहुंचिस हे। ए सब ला देखत हुए प्रशासन ह अब कड़ा रुख अपनावत हे।
बीएनएसएस के धारा 163 के तहत पाबंदी
भोपाल पुलिस कमिश्नर हरिनारायण चारी मिश्र ह सहर के सीमा के भीतर चाइनीज मांझा के रखे, बेचे अउ उड़ाए ऊपर पहिली ले रोक लगा दे हे। ए फैसला भारतीय नागरिक सुरक्षा संहिता (BNSS) 2023 के धारा 163 (2) के तहत ले गे हे। अगर कोनो घलो मनखे चाइनीज मांझा बेचत या उपयोग करत धराही, त ओकर ऊपर कड़ी कानूनी कार्रवाई करे जाही।
सुरक्षा बर पुलिस के अपील
भोपाल पुलिस ह चिरई-चिरगुन, रद्दा म चलइया मनखे अउ गाड़ी चलइया मन के सुरक्षा ला देखत हुए ए अभियान छेड़े हे। प्रशासन ह दुकानदार अउ आम जनता ले अपील करे हे कि सिरिफ सुरक्षित सूती धागा (मांझा) के ही प्रयोग करव। अगर कोनो मेर चाइनीज मांझा बिकावत हे, त ओकर जानकारी तुरंत पुलिस ला देव, ताकि कोनो अनहोनी ला रोके जा सके।
