अब कक्षा 3वीं ले 8वीं तक के लइका मन घलो पढ़िही एआई, पढ़ाई ला आधुनिक बनाए बर ‘कंप्यूटेशनल थिंकिंग’ कोर्स होइस लॉन्च
Artificial Intelligence in Schools : नई दिल्ली। सेंट्रल बोर्ड ऑफ सेकेंडरी एजुकेशन (CBSE) ह लइका मन के पढ़ाई ला अउ जादा आधुनिक बनाय बर एक बड़े फैसला लिस हे। बोर्ड ह अब कक्षा 3वीं ले 8वीं तक के लइका मन बर ‘कंप्यूटेशनल थिंकिंग अउ आर्टिफिशियल इंटेलिजेंस’ (CT&AI) नाम के एक नवा कोर्स शुरू करे हे। सरकार के लक्ष्य हे कि साल 2030 तक देश के हर छात्र ला एआई (AI) के जानकारी हो जाय।
नवा नियम के मुताबिक, शैक्षणिक सत्र 2026-27 ले कक्षा 9वीं में चलत एआई के सबो पुराना कोर्स मन ला बंद कर दे जाही। ओकर जगह एनसीईआरटी (NCERT) ह नवा मॉड्यूल तैयार करत हे। सीबीएसई के कहना हे कि ये नवा कोर्स लइका मन ऊपर कोनो अलग ले किताब के बोझ नहीं बनही। ये ह गणित के किताब के संग-संग चलही। जइसन मास्टर मन क्लास में गणित पढ़ाही, ओइसने ओकर ले जुड़े एआई के एक्टिविटी घलो कराए जाही।
ये किताब मन में रटे वाला सवाल नहीं, बल्कि सोचे अउ दिमाग लगाय वाला सवाल होही, जेकर ले लइका मन के तर्कशक्ति बाढ़य। सीबीएसई ह अपन वेबसाइट में एकर बर हैंड बुक्स घलो जारी कर दीस हे। मास्टर मन बर घलो नवा गाइडलाइन आय हे, जेमा कहे गे हे कि मन लइका मन ला सीधा उत्तर न बताय, बल्कि मनला खुद सोचे अउ गलती करके सीखे के मौका देवय।
कक्षा 9वीं ले 12वीं तक के छात्र मन बर एनसीईआरटी ह विशेष मॉड्यूल बनावत हे, जे ह आंतरिक मूल्यांकन (Internal Assessment) के हिस्सा होही। ये नवा पढ़ाई में साइबर सिक्योरिटी, नेटवर्किंग अउ गेमिंग टूल्स जइसन आधुनिक चीज मन ला घलो सिखाए जाही, ताकि लइका मन ला पढ़ाई बोझिल झन लागय।
