Anthropic के ग्लोबल सर्वे मा खुलासा- AI ले का चाहत हें लोगन मन अऊ कउन बात के हे डर?
Anthropic AI Survey 2026 : क्लाउड एआई’ (Claude AI) बनाय वाला कंपनी एंथ्रोपिक (Anthropic) ह दुनिया भर के 159 देस मन मा एक ठन बड़े सर्वे करे हे। ए सर्वे मा 81,000 मनखे मन अपन राय दीन। एमा ये बात आगू आई हे कि मनखे मन एआई (AI) ले अपन समय बचाय अऊ काम ल जल्दी निपटाय के उम्मीद रखथें, पर ओमन ल एआई ऊपर भरोसा के कमी अऊ नौकरी जाय के डर घलो सतावत हे। भारत अऊ ब्राजील जइसन देस मन मा एआई ल लेके लोगन मन के सोच ह सकारात्मक (बढ़िया) दिखे हे।
मनखे मन AI ले का चाहत हें सर्वे मा सबले जादा मनखे मन ह कहिन कि ओमन AI ले अपन समय बचाना चाहथें। करीब 18.8% लोगन मन ह अपन काम मा सफ़लता (Professional Excellence) ल पहिली पसंद बताइन, त 13.7% मनखे मन ह अपन निजी जिनगी मा बदलाव (Personal Transformation) ल जरूरी मानिन। बहुत झन के कहना हे कि ओमन रोज के छोटे-मोटे काम बर AI के मदद लेथें ताकि ओमन बड़े अऊ जरूरी काम मा जादा धियान दे सकें।
एखर अलावा पइसा के आजादी, समाज मा बदलाव अऊ नवा चीज मन ल सीखे बर घलो लोगन मन AI के उपयोग करना चाहथें। फेर सिरिफ 5.6% लोगन मन ह ही ‘क्रिएटिव काम’ (जैसे कविता या कहानी लिखना) बर एआई के उपयोग ल पसंद करिन।
सबले बड़े चिंता कउन बात के हे AI ल लेके सबले बड़े डर ‘भरोसा के कमी’ (26.7%) के हे। लोगन मन ल लगत हे कि AI हर बखत सही जानकारी नहीं देवय। ओखर बाद नौकरी छूट जाय अऊ अरथव्यवस्था ऊपर असर (22.3%) के डर हे। लोगन मन ल ये घलो चिंता हे कि कहीं AI मनखे मन ऊपर कंट्रोल (Control) झन कर ले। एखर अलावा गलत जानकारी, प्राइवेसी के खतरा अऊ एआई के गलत इस्तेमाल ल लेके घलो मनखे मन डरे हें।
कउन देस के का हे हाल ए सर्वे मा ये घलो दिखे हे कि अलग-अलग देस मा लोगन मन के सोच अलग हे। भारत, ब्राजील अऊ इजराइल के मनखे मन AI ल लेके बहुत उत्साहित हें। वहीं फ्रांस, जापान अऊ अमेरिका मा मिले-जुले असर दिखे हे। जर्मनी, दक्षिण कोरिया अऊ ब्रिटेन के लोगन मन AI ल थोरिक संका के नजर ले देखथें।
