खेलो इंडिया ट्राइबल गेम्स 2026 के पहली महिला स्वर्ण पदक विजेता बनिस छत्तीसगढ़ बेटी अंजलि मुंडा
Khelo India Tribal Games 2026 : रायपुर, 26 मार्च 2026/ कभू-कभू जिनगी के रद्दा एक छोटे से फैसला ले बदल जाथे। ओडिशा के 15 साल के अंजलि मुंडा के कहानी घलो अइसने हे। साल 2022 मं जब स्कूल मं खेल चुने के बारी आइस, त उमन तैराकी (Swimming) ला चुनिन। ओ बखत उमन ये खेल ला सिरिफ मनोरंजन समझत रहिन, फेर आज उही फैसला ह उमन ला राष्ट्रीय स्तर मं ऐतिहासिक जीत दिला दीस।
ओडिशा के जाजपुर जिला के गहिरागड़िया गांव के रहइया अंजलि ह रायपुर मं आयोजित ‘खेलो इंडिया ट्राइबल गेम्स 2026’ मं 200 मीटर फ्रीस्टाइल तैराकी मं 2:39.02 सेकंड के समय निकाल के स्वर्ण पदक (Gold Medal) अपन नाम कर लिस। एखर साथे उमन ये प्रतियोगिता के पहली महिला गोल्ड मेडलिस्ट बन गे हें।
साधारण परिवार ले आवे वाली अंजलि अपन चार भाई-बहिनी मं सबले छोटी हे। ओखर ददा एक स्थानीय फैक्ट्री मं वैन चलाथें। 10 साल के उमर मं अंजलि ह कलिंगा इंस्टिट्यूट ऑफ सोशल साइंसेज ले जुड़िस, जिहां उमन ला मुफ्त शिक्षा अऊ ट्रेनिंग मिलीस। इहें ले ओखर खेल के नींव मजबूत होइस।
अंजलि अपन ये सफलता के श्रेय अपन कोच मन ला अऊ खेल मंत्रालय के ‘अस्मिता लीग’ ला देथे। अंजलि ह बताइस कि साल 2024 मं संबलपुर अऊ गुवाहाटी मं आयोजित लीग मं उमन रजत पदक जीते रहिन, जेखर से ओखर भरोसा बढ़िस। हालांकि, अंजलि ह अभी घलो संतुष्ट नई हे, ओखर लक्ष्य हे कि अपन समय ला अऊ कम करके रिकार्ड बनावय। अब अंजलि के नजर आने वाला मैच- 50 मीटर बैकस्ट्रोक, 100 मीटर बैकस्ट्रोक अऊ 200 मीटर इंडिविजुअल मेडली मं हे, जिहां वो हा अऊ बढ़िया प्रदर्शन करना चाहथे।
