अंबेडकर अस्पताल के नवा कीर्तिमान: डॉक्टर मन 11 साल के लइका के दिल ले चिपके दुर्लभ कैंसर ला निकालिन, बनाइस वर्ल्ड रिकॉर्ड
Ambedkar Hospital Raipur World Record : रायपुर। राजधानी के मेकाहारा (डॉ. भीमराव अंबेडकर अस्पताल) ह चिकित्सा के क्षेत्र मा एक बड़का इतिहास रच देहे। अस्पताल के हार्ट, चेस्ट अउ वैस्कुलर सर्जरी विभाग के डॉक्टर मन ह 11 साल के एक झन लइका के दिल ले चिपके ‘थायमिक कैंसर’ (थायमोमा) के सफल ऑपरेशन करके दुनिया भर मा नवा कीर्तिमान स्थापित करे हें।
एमा सबले बड़े बात ये हे कि मेडिकल किताब मन मा अब तक अइसने कैंसर के सबले कम उमर के मरीज 12 साल के दर्ज रिहिस, लेकिन हमर छत्तीसगढ़ के डॉक्टर मन ह 11 साल के लइका के सफल ऑपरेशन करके वर्ल्ड रिकॉर्ड बना दे हें।
40 ले 60 साल के मनखे मन मा होथे ए बीमारी
डॉक्टर मन के मुताबिक, ए किस्म के ट्यूमर (कैंसर) आमतौर मा 40 ले 60 साल के उमर दराज मनखे मन मा पाय जाथे। लइका मन मा ए बीमारी के होना बहुत दुर्लभ (Very Rare) आय। चांपा के रहइया कक्षा छठवीं के ए लइका ला पिछले 6 महीना ले छाती मा पीरा अउ सांस फूले के तकलीफ रिहिस। जांच मा पता चलिस कि ओखर सीने मा एक बड़का ट्यूमर हे, जेन ह दिल, फेफड़ा अउ मुख्य नस मन ले बुरी तरह चिपके हे। कतको अस्पताल मन ह रिस्क देख के ऑपरेशन करे ले मना कर दे रहिन।
4 घंटा तक चलिस जटिल ऑपरेशन
विभागाध्यक्ष डॉ. कृष्णकांत साहू अउ ओखर टीम ह ए चुनौती ला स्वीकार करिस। ‘ड्यूल एप्रोच तकनीक’ ले लगभग 4 घंटा तक चले ए ऑपरेशन मा लइका के छाती ले 400 ग्राम के ट्यूमर ला सुरक्षित निकालगे। ए ट्यूमर दिल के ‘लेफ्ट एट्रियम’ अउ फेफड़ा ले चिपके रिहिस, जेला बहुत सावधानी ले अलग करे गिस। हार्ट-लंग मशीन के मदद ले ए कठिन काम ला मुमकिन बनाय गिस।
अब लइका ह पूरी तरह स्वस्थ हे
ऑपरेशन अउ कैंसर विभाग डाहर ले ‘रेडिएशन थेरेपी’ मिले के 6 महीना बाद अब लइका ह पूरी तरह चंगा हे। ओ ह फेर ले स्कूल जाय ला धर लेहे अउ छठवीं क्लास के परीक्षा घलो देहे। ए दुर्लभ केस ला राष्ट्रीय कैंसर सर्जरी सम्मेलन मा ‘बेस्ट पेपर अवार्ड’ घलो मिले हे। अब एला इंटरनेशनल मेडिकल जर्नल मा छापे के तैयारी चलत हे।
स्वास्थ्य मंत्री अउ डीन ह दीन बधाई
अंबेडकर अस्पताल के ए सफलता बर स्वास्थ्य मंत्री श्याम बिहारी जायसवाल, मेडिकल कॉलेज के डीन डॉ. विवेक चौधरी अउ अधीक्षक डॉ. संतोष सोनकर ह डॉक्टर मन के टीम ला बधाई दीन। ओमन कहिन कि अब छत्तीसगढ़ के मनखे मन ला अइसने जटिल ऑपरेशन बर बड़े शहर जाय के जरूरत नइ हे।
