अग्निवीर भर्ती म मिलिस राहत : अब 10 अप्रैल तक भर सकथव फॉर्म, लइका मन के मदद बर बनीस हेल्प डेस्क
Agniveer Bharti : भारतीय सेना म अग्निवीर बने के सुघ्घर मौका देखत जुवान मन बर एक बड़े खुशखबरी निकल के आगू आई हे। अग्निवीर भर्ती बर ऑनलाइन आवेदन करे के आखिरी तारीख ला अब बढ़ा दे गे हे। पहिली ए काम बर 1 अप्रैल 2026 तक के समय रिहिस, जेला अब बढ़ा के 10 अप्रैल 2026 कर दे गे हे। जऊन भी लइका मन सेना म भर्ती होय के इच्छा रखथें, ओ मन आधिकारिक वेबसाइट www.joinindianarmy.nic.in म जाके अपन फॉर्म भर सकथें।
बता दन कि ए भर्ती बर आवेदन के प्रक्रिया 13 फरवरी 2026 ले सुरू होय रिहिस। एमा साढ़े 17 बछर ले लेके 21 बछर तक के उमर वाले जुवान मन पात्र हें। पढ़ाई-लिखाई के बात करन त 8वीं पास ले लेके स्नातक (ग्रेजुएट) या डिप्लोमा धारी लइका मन घलो अलग-अलग पद बर अपन अर्जी लगा सकथें।
कलेक्टर डॉ. गौरव सिंह ह जिला के जुवान मन ला फॉर्म भरे म कोनो तकलीफ झन होय, एखर बर ब्लॉक स्तर म हेल्प डेस्क बनाय के निर्देश दे हें। अब लइका मन सरकारी दफ्तर मन म जाके भर्ती ले जुड़े जानकारी अउ मदद ले सकथें। रोजगार कार्यालय, नगर निगम, पॉलिटेक्निक कॉलेज, सरकारी कॉलेज, आईटीआई अउ जनपद पंचायत मन म घलो सहायता केन्द्र खोले गे हे। अगर फॉर्म भरे म कोनो भी किसम के दिक्कत आथे, त आवेदक मन रायपुर के रोजगार कार्यालय म बने सेना भर्ती हेल्प डेस्क म जाके अपन समस्या के समाधान कर सकथें।
