परीक्षा के तैयारी करत लइका ह फांसी लगा के अपन जान दीस

बिलासपुर। छत्तीसगढ़ के बिलासपुर मा प्रतियोगी परीक्षा के तैयारी करत एक 26 साल के लइका ह किराया के कमरा मा फांसी लगा के अपन जान दे दीस। ये घटना सरकंडा थाना क्षेत्र के कपिल नगर के आय। मृतक के पहचान रायगढ़ के रहइया आकाश कुमार पंडा के रूप मा होय हे।

सोमवार संझा के जब आकाश के संगवारी मन ओकर ले मिले बर पहुंचिन, त कमरा भीतर ले बंद रहीस। मोबाइल के घंटी बाजत रहीस फेर जब कोनो जवाब नई मिलिस, त संगवारी मन खिड़की ले झांक के देखिन। भीतर आकाश के लास फंदा मा लटकत रहीस, जेला देख के सब सन्न रह गे। पुलिस ह रायगढ़ ले ओकर घर वाला मन के पहुंचे के बाद ओमन के आगू मा दरवाजा ल तुड़वाईस। कमरा ले एक ठन सुसाइड नोट घलो मिले हे। पुलिस ह पोस्टमार्टम के बाद लास ल घर वाला मन ल सउप दीस हे अउ मामला के जांच करत हे।