सीजी सेट अभ्यर्थी मन बर बड़े खबर! अब 19 नइ, 30 विषय म होही परीक्षा, फॉर्म भराए के होगे शुरू
CG SET 2026 : रायपुर। छत्तीसगढ़ राज्य पात्रता परीक्षा (CG SET) 2026 बर ऑनलाइन फॉर्म भरे के काम शुरू होगे हे। ए पइत परीक्षा म बड़े बदलाव करत हुए विषय मन के संख्या ला 19 ले बढ़ाके 30 कर दे गय हे। सीजी सेट 2024 के तुलना म ए साल 11 नवा विषय जोड़े गे हे। सीजीएसएसबी के मुताबिक अभ्यर्थी मन 17 अगस्त के सांझ 5 बजे तक ऑनलाइन आवेदन कर सकहीं। फॉर्म म ककोनो गलती होए म 18 ले 20 अगस्त तक सुधार करे के मौका घलो मिलही।
11 नवा विषय ले बढ़ही मौका ए पइत मानवशास्त्र, संगीत, कला मंच-नृत्य, नाटक अउ थियेटर, फाइन आर्ट अउ मूर्तिकला, योग, लोक प्रशासन, रक्षा अउ सामरिक अध्ययन (डिफेंस एंड स्ट्रैटेजिक स्टडीज), दर्शनशास्त्र, प्रबंधन, जनसंचार अउ पत्रकारिता अउ पृथ्वी, वायुमंडलीय, महासागरीय अउ ग्रहीय विज्ञान कस नवा विषय मन ला शामिल करे गे हे। ए विषय मन के शामिल होए ले एमा एम.ए./एम.एससी. (स्नातकोत्तर) करे युवा मन ला अब राज्य पात्रता परीक्षा दे के मौका मिलही।
10 जिला मुख्यालय म होही परीक्षा सीजीएसएसबी के तय कार्यक्रम के मुताबिक सीजी सेट के परीक्षा 4 अक्टूबर (रविवार) के प्रदेश के 10 जिला मुख्यालय म आयोजित करे जाही। परीक्षा दो पाली म होही। पहिल प्रश्नपत्र बिहनिया 10 बजे ले 11:15 बजे तक अउ दूसर प्रश्नपत्र मंझनिया 2 बजे ले 4:15 बजे तक होही।
ए 30 विषय म होही परीक्षा हिंदी, अंग्रेजी, राजनीति विज्ञान, अर्थशास्त्र, समाजशास्त्र, इतिहास, भूगोल, भौतिकी, गणितीय विज्ञान, रसायन विज्ञान, जीवन विज्ञान, कंप्यूटर साइंस एंड एप्लीकेशन, वाणिज्य, विधि, संस्कृत, मनोविज्ञान, ग्रंथालय अउ सूचना विज्ञान, शारीरिक शिक्षा, गृह विज्ञान, मानवशास्त्र, संगीत, कला मंच-नृत्य, नाटक अउ थियेटर, फाइन आर्ट अउ मूर्तिकला, योग, लोक प्रशासन, रक्षा अउ सामरिक अध्ययन, दर्शनशास्त्र, प्रबंधन, जनसंचार अउ पत्रकारिता अउ पृथ्वी, वायुमंडलीय, महासागरीय अउ ग्रहीय विज्ञान म परीक्षा आयोजित करे जाही।
का एय सीजी सेट अउ काबर हे जरूरी? छत्तीसगढ़ राज्य पात्रता परीक्षा (CG SET) राज्य स्तर के पात्रता परीक्षा ए, जेकर आयोजन छत्तीसगढ़ कर्मचारी चयन मंडल (CGSSB) कोति ले करे जाथे। ए परीक्षा राज्य के विश्वविद्यालय अउ कॉलेज म असिस्टेंट प्रोफेसर (सहायक प्राध्यापक) बने बर जरूरी पात्रता तय करथे। सेट पास करे ले सीधा नौकरी नि मिलै, लेकिन सहायक प्राध्यापक भर्ती बर ए परीक्षा पास होना जरूरी रहिथे।
