मेकाहारा के इमरजेंसी वार्ड में अचानक लागिस आगी, मरीज मन ला शिफ्ट करके बचाइन जान
Mekahara Raipur news : रायपुर: राजधानी के सबले बड़े सरकारी अस्पताल डॉ. भीमराव आंबेडकर स्मृति चिकित्सालय (मेकाहारा) के इमरजेंसी वार्ड में मंगर के अचानक आगी लाग गे, जेकर ले उहां भारी हड़कंप मच गे। आगी के लपट ल देखत ले कैजुअल्टी वार्ड में अफरा-तफरी मच गे अउ मरीज अउ ओमन के संगी-सोहती मन में चीख-पुकार मच गे।
घटना के खबर मिलत ले अस्पताल प्रशासन ह तुरंत मोर्चा संभालिस। सुरक्षा ल ध्यान में रखत हुए इमरजेंसी में भरती मरीज मन ल तड़बड़ दूसर वार्ड मन में शिफ्ट करे गिस। खबर पाके दमकल के कतको गाड़िया अउ मौदहापारा थाना पुलिस ह मौका में पहुँचीस। भारी मेहनत के बाद दमकल वाले मन आगी ऊपर पूरा काबू पा लीन।
शुरुआती तौर में आगी लागे के वजह शॉर्ट सर्किट ला बताए जात हे, तभो ले अस्पताल प्रबंधन अउ पुलिस प्रशासन ह मामला के पूरा जांच में जुटे हे। राहत के बात ये रीहिस कि ई हादसा में कोनो के जान-माल के नुकसान या घायल होए के खबर नइये। प्रदेश के सबले बड़े अस्पताल के इमरजेंसी वार्ड में होए ई घटना ह अस्पताल के सुरक्षा व्यवस्था ऊपर गंभीर सवाल खड़े कर दे हे।
