साय कैबिनेट के बैठक मा दुठन बड़े फैसला…
रायपुर। छत्तीसगढ़ के साय सरकार हा राज्य के युवाओं अउ किसान भाई मन बर दुठन बड़े अउ काम के फैसला लेवे हे। मुख्यमंत्री विष्णु देव साय के अध्यक्षता मा होईस कैबिनेट बैठक मा सेना ले लौटईया अग्निवीर मन ल सरकारी नौकरी मा जगहा देए अउ खेती-खार के बखत खाद के किल्लत ल रोके बर बड़का योजना बनाए गे हे।
अग्निवीर मन ल सरकारी नौकरी मा मिलही 10% छूट
सेना मा चार साल के सेवा पूरा करके लवटईया छत्तीसगढ़ के अग्नवीर मन बर सरकार हा रोजगार के नवा दुवार खोल दे हे। अब प्रदेश के अग्निवीर मन ल पुलिस विभाग मा आरक्षक, जंगल विभाग मा वनरक्षक अउ जेल मा प्रहरी जइसन तीसर श्रेणी (तृतीय श्रेणी) के पदों मा 10 प्रतिशत के सीधा आरक्षण (छूट) दीही। एखर बर सरकार हा नवा नियम बनाए के तैयारी मा हे।
किसान मन बर खाद के निगरानी समिति
किसान मन ल खरीफ अउ रबी के फसल मा खाद बर भटके बर न परय, एखर बर मंत्रियों के एकठन विशेष उप-समिति बनाए के फैसला करे गे हे। डिप्टी सीएम के अगुवाई मा बने ए समिति मा कृषि, सहकारिता अउ वित्त मंत्री शामिल रहिही। ए समिति हा पूरे छत्तीसगढ़ मा खाद के आवक, बांटे के व्यवस्था अउ स्टॉक के ऊपर पैनी नजर रखही, ताकि बोवई के बखत किसान मन ल कोनो तकलीफ न होवय।
