पुलिसवाले के बेटी ह करिस आत्महत्या, मार्ट मालिक ह चोरी के आरोप लगा के छीन ले रहीस स्कूटी
Pooja Painkra Suicide : छत्तीसगढ़ के कोरिया जिला मुख्यालय बैकुंठपुर ले एक ठन बड़ दुखद अउ घिनौना मामला अगाू आए हे। इहां एक ठन किराना स्टोर के मालिक डहर ले मानसिक रूप से प्रताड़ित करे जाए के सेती तंग आके एक जन पुलिसवाले के 17 साल के बेटी ह फांसी लगा के अपन जान दे बिस। ए घटना के बाद ले पूरा इलाका म भारी गुस्सा हे अउ माहौल गरमा गे हे।
- सामान चोरी के आरोप लगा के बंधक बनॉइन अउ जबरन लिखवाइस कागज म
- स्कूटी ला रख लिन अउ परिवार ले मांगिन 50 हजार रुपिया
- डरेमारे नाबालिग ह क्वार्टर म लगाइस फांसी, सुसाइड नोट मिलिस
- पुलिस के बड़ कार्रवाई, आईसी मार्ट सील अउ तीन झन ऊपर एफआईआर
- विधायक संग थाना के घेराव, मेहरारू मन ह नेशनल हाईवे म करिन चक्काजाम
- राजनीतिक अउ आदिवासी समाज म भारी गुस्सा
सामान चोरी के आरोप लगा के बंधक बनॉइन अउ जबरन लिखवाइस कागज म
घटना 7 जुलाई के ए। बैकुंठपुर के फव्वारा चौक तीर म बने ‘आईसी मार्ट’ म प्रधान आरक्षक शिवनाथ सिंह के 17 साल के बेटी पूजा पैंकरा अपन बहिनी संग सामान बिसाए बर गए रहीस। मार्ट के मालिक ह दूनों बहिनी मन ऊपर 1500 रुपिया के कॉस्मेटिक सामान चोरी करे के आरोप लगाइस। ओकर बाद मालिक ह दूनों ला ओही जा कन्ना छेक के राख लिस अउ दबाव बना के एक ठन लिस्ट बनवाईस। आरोपी मन दूनों बहिनी ले जबरन लिखवा लिन कि “मैं अउ मोर बहिनी ह आईसी मार्ट ले चोरी करे हन” अउ ओ कागज म दूनों के दस्तखत घलो करवा लिन।
स्कूटी ला रख लिन अउ परिवार ले मांगिन 50 हजार रुपिया
आरोपी मन लड़की मनला छोड़े के पहिली ओकर स्कूटी ला घलो छीन लिन। जब नाबालिक लड़की ह ए बात ला अपन ददा ला न बता के एक जन जान-पहचान के एएसआई (ASI) ला बताइस, त ओ ह स्कूटी ला छुड़वाए बर मार्ट पहुंचिस। मार्ट मालिक ह ओकर ले 20 हजार रुपिया मांगिस। ओकर बाद जब लड़की के पुलिसवाला ददा ह खुद आईसी मार्ट पहुंचिस, त मालिक ह स्कूटी के बदला म 50 हजार रुपिया के मांग कर बिस। ए सब बात अउ समाज म बदनामी के डर सेती लड़की ह भारी मानसिक दबाव म आ गे रहीस।
डरेमारे नाबालिग ह क्वार्टर म लगाइस फांसी, सुसाइड नोट मिलिस
8 जुलाई के मंझनिया जब लड़की के ददा ह अपन घरवाली (लड़की के महतारी) ला ले बर बस स्टैंड गए रहीस, तेही बेरा सून घर पा के 17 साल के पूजा ह पुलिस लाइन के सरकारी क्वार्टर म फांसी लगा के आत्महत्या कर लिस। लड़की तीर ले एक ठन सुसाइड नोट घलो मिले हे, जेला पुलिस ह अपन जांच म राखे हे अउ अभी ओला उजागर नहीं करे हे।
पुलिस के बड़ कार्रवाई, आईसी मार्ट सील अउ तीन झन ऊपर एफआईआर
घटना के जानकारी मिलते च कोतवाली पुलिस ह बड़ कार्रवाई करिस। पुलिस ह तुरंत ‘आईसी मार्ट’ ला पूरी तरह ले सील कर दे हे। ए मामला म आरोपी मार्ट मालिक दीपक वैद, विनोद वैद अउ जगत वैद के खिलाफ भारतीय न्याय संहिता (BNS) के धारा 296, 107, 308(2), 309(4) अउ अनुसूचित जाति-जनजाति (अत्याचार निवारण) अधिनियम (ST-SC Act) के धारा 3(2)(5) के तहत गंभीर केस दर्ज करे गे हे। अभी तीनों आरोपी मन फरार हन अउ पुलिस ओ मनला खोजत हे।
विधायक संग थाना के घेराव, मेहरारू मन ह नेशनल हाईवे म करिन चक्काजाम
लड़की के मौत के दूसर दिन बैकुंठपुर म मनखे मन के गुस्सा फूट पड़िस। बैकुंठपुर विधायक भइयालाल राजवाड़े ह पीड़ित परिवार ले मिले बर अस्पताल पहुंचिस अउ तुरंत कार्रवाई के मांग ला लेके कोतवाली थाना म जा के बैठ गे। दूसर डहर, पीड़ित पक्ष के कतको मेहरारू (महिला) मन ह कोतवाली थाना ला घेर लिन। गुस्साए मेहरारू मन ह आईसी मार्ट के आगू नेशनल हाईवे 43 (NH 43) के मंझात सड़क म बइठ के चक्काजाम कर दिन अउ जोर-जोर से नारा लगाइन। प्रदर्शन करे अइया मन के कहना रहीस कि जब तक आरोपी मनला पुलिस ह धर नहीं लेही, तब तक लास के पोस्टमार्टम नहीं होवन देन। एएसपी सुरेशा चौबे ह मौका म पहुंच के आरोपी मनला जल्दी धरे के भरोसा दिस, तब जाके चक्काजाम खुलिस।
राजनीतिक अउ आदिवासी समाज म भारी गुस्सा
ए अमानवीय घटना ला लेके इलाका के राजनीतिक अउ सामाजिक संगठन मन ह भारी गुस्सा जताए हन। पूर्व संसदीय सचिव अंबिका सिंहदेव ह ए घटना के कड़े शब्द म निंदा करत कहिस कि एक ठन छोटे से बात ला एतका बढ़ा देना कि एक जन नाबालिग ला अपन जान दे बर पड़िस, ए बड़ सरमनाक हे। ओ ह कड़क जांच के मांग करे हे।
ओहे डहर सर्व आदिवासी समाज के जिला अध्यक्ष विजय सिंह अउ गोंडवाना गणतंत्र पार्टी (गोंगपा) के प्रदेश अध्यक्ष संजय सिंह कमरो ह जिला पुलिस अधीक्षक (SP) ला ज्ञापन सौंप के कहिन कि आदिवासी समाज के बेटी ला मानसिक रूप से प्रताड़ित करके आत्महत्या बर मजबूर करे अइया दोषी मनला कतनो हाल म बख्शे झन जाए अउ ओ मन ऊपर कड़े से कड़े कानूनी कार्रवाई करके पीड़ित परिवार ला न्याय दिए जाए।
