CGPSC के बड़े फैसला! अब उम्मीदवार मन के राय ले बदलही मेन्स के सिलेबस, जानव कैसे देव सुझाव
CGPSC mains exam pattern 2026 : रायपुर। छत्तीसगढ़ लोक सेवा आयोग (CGPSC) ह राज्य सेवा मुख्य परीक्षा (Mains) के सिलेबस म संसोधन करे के तैयारी सुरू कर दे हे। परीक्षा ल अउ जादा साफ-सुथरा (पारदर्शी) अउ परीक्षार्थी मन के हित म बनाए बर आयोग ह पहिली बार उम्मीदवार मन ले ऑनलाइन सुझाव मांगे हे।
जे मन घलो अपन सुझाव देना चाहत हें, ओ मन आयोग के ऑफिसियल पोर्टल म जाके ऑनलाइन रजिस्ट्रेशन कर सकत हें। अउ जे मन पहिली ले रजिस्टर्ड हें, ओ मन अपन पुराना यूजर आईडी अउ पासवर्ड ले लॉगिन करके सीधे अपन राय भेज सकत हें। आयोग ह अधिसूचना जारी होए के तारीख ले एक महीना तक के समय सुझाव भेजे बर तय करे हे।
अब्बड़ दिन बाद अइसन फैसला: अब अभ्यर्थी घलो तय करिहें सिलेबस के दिशा
CGPSC के इतिहास म ये पहिली बार होवत हे जब मुख्य परीक्षा के पाठ्यक्रम (सिलेबस) म बदलाव बर अइसन आम राय मांगे गए हे। आयोग के सोंच हे कि सिलेबस ल आज के प्रशासनिक जरूरत अउ बदलते कंपटीशन के हिसाब से तैयार करे जाए, जेकर ले परीक्षा प्रणाली अउ जादा व्यावहारिक अउ छात्र मन बर उपयोगी बन सके।
अभी के भर्ती ऊपर नई पडही कोनो असर
आयोग ह साफ-साफ कह दे हे कि ये होने वाला सिलेबस संसोधन के असर अभी चलत राज्य सेवा भर्ती प्रक्रिया ऊपर बिल्कुल नई पडही। अभी के परीक्षा चक्र म सामिल छात्र मन के मेन्स परीक्षा पुराना सिलेबस के हिसाब से ही होही। सुझाव मन के आधार म जो घलो नवा सिलेबस तैयार होही, ओला आघू (भविष्य) म होने वाला राज्य सेवा परीक्षा मन म लागू करे जाही, ताकि छात्र मन ल तैयारी बर पूरा समय मिल सके।
अभी कइसन हे मेन्स परीक्षा के पैटर्न?
अभी के नियम के हिसाब से प्री परीक्षा (Prelims) पास करे के बाद मेन्स परीक्षा (Mains) दिलाए बर पड़थे। मेन्स म कुल ७ अनिवार्य पेपर होथें। हर पेपर २०० नंबर के होथे अउ कुल मिला के १४०० नंबर के परीक्षा होथे। ये पूरा परीक्षा लिखित (Descriptive) होथे, जेम भासा, निबंध अउ सामान्य अध्ययन (GS) ले जुड़े सवाल पूछे जाथें।
