बिलासपुर मा ‘ED अधिकारी’ बनके ठगी: रेलवे नौकरी के लालच देके मियां-बीबी ह लगइस के चूना
Bilaspur crime news : बिलासपुर: रेलवे में सरकारी नौकरी लगवाए के झांसा देके लाखों रुपिया के ठगी करे के एक बड़ मामला बिलासपुर से आघू आए हे। पीड़ित के सिकायत के बाद पुलिस ह एक झन मियां-बीबी (दंपती) के खिलाफ धोखाधड़ी के केस दरज करके जांच सुरू कर दे हे। ठग ह पहिली त अपन आप ला प्रवर्तन निदेशालय (ED) के बड़ अधिकारी बताके भरोसा जीतिस, ओकर बाद रेलवे मा नौकरी लगवाए के नाम मा 3 लाख 14 हजार 600 रुपिया ऐंठ लिस। जब कतको दिन तक नौकरी नहीं मिलिस, त आरोपी ह बात ला टारे बर नगर निगम के दुकान देवाए के लालच देके मामला ला दबाए के कोसिस करिस।
खुद ला ED अधिकारी बताके जितिस बिसवास
जानकारी के मुताबिक, पीड़ित विस्नु नारायन महतो के मुलाकात बछर 2021 मा राहुल मिश्रा उर्फ राहुल भारद्वाज नाम के मनखे से होईस रीहिस। राहुल ह अपन आप ला ED के अधिकारी बताइस अउ कहिस कि रेलवे मा ओकर बड़ पहुंच हे। ओ ह विस्नु ला भरोसा दिलाइस कि ओकर सरकारी नौकरी लगवा दिही। आरोपी के अतरंगी बात मा आके पीड़ित ह अलग-अलग किसत मा कुल 3,14,600 रुपिया ओला दे बईठिस। आरोपी ह हर बार अही कहय कि “भरती के काम चलत हे, संसो मत कर, जल्दी नौकरी मिल जाही।”
नौकरी नहीं मिलिस त दुकान देवाए के गोठ कहिस
जब कतको समय बीत गे अउ रेलवे मा नौकरी नहीं लगिस, त पीड़ित ह अपन रुपिया वापस मांगे बर धरिस। रुपिया लौटाए के जगा आरोपी ह ओला नवा लालच दे देिस। ओ ह कहिस कि पुराना बस स्टैंड करा नगर निगम के दुकान ओकर नाम मा करवा दिही। आरोपी ह आसा दिलाइस कि “नौकरी नहीं लगिस त का होईस, दुकान त मिलही।” ओकर बाद न नौकरी मिलिस अउ न दुकान। तब जाके पीड़ित ला समझ आईस कि ओकर साथ बड़ धोखाधड़ी होगे हे।
पुलिस मा सिकायत के बाद दरज होईस FIR
पीड़ित ह ए पूरा ठगी के सिकायत बिलासपुर पुलिस से करिस। जांच-पड़ताल के बाद पुलिस ह आरोपी राहुल मिश्रा उर्फ राहुल भारद्वाज अउ ओकर मनराजी (पत्नी) पूनम के खिलाफ जालसाजी अउ ठगी के धारा मन के तहत FIR दरज कर ले हे।
दूसर मन से भी ठगी के असंका पुलिस के पहिली जांच मा ए पता चले हे कि आरोपी ह रेलवे मा नौकरी अउ नगर निगम मा दुकान देवाए के नाम मा अउ कतको झन से रुपिया ठगे हो सकत हे। पुलिस ए बात के पता लगावत हे कि कहुं अउ कोनो मनखे ए मन के चंगुल मा त नहीं आए हे।
पुलिस करत हे गम्भीरता से जांच
पुलिस अधिकारी मन के कहना हे कि मामला के जांच तेजी से चलत हे। रुपिया के लेन-देन, बैंक के खाता अउ दूसर सबूत मन ला बटोरे जात हे। पुलिस ह आम जनता से अपील करे हे कि “सरकारी नौकरी लगवाए के नाम मा कोनो भी अनजान मनखे ला रुपिया झन दव, अउ अइसन कोनो संका होए मा तुरते पुलिस ला खबर करव।”
