मजदूरी दर मा बढ़ोतरी :1 जुलाई ले नवा नियम लागू, अब रोज मिलही 300 रुपिया
VB G RAM G : रायपुर। वीबी जी राम जी (VB G RAM G) के लागू होय के पहिली दिन च श्रमिकों मन ल बड़े सुघ्घर सौगात मिले हे। भारत सरकार कोति ले विकसित भारत-रोजगार अउ आजीविका गारंटी मिशन (ग्रामीण) के तहत अकुशल मजूर मन बर नवा मजदूरी दर तय कर दे गे हे। ए नवा दर मन आज, 1 जुलाई 2026 ले लागू हो गे हें।
नवा व्यवस्था के तहत हमर छत्तीसगढ़ में ग्रामीण मजूर मन के मजदूरी दर ल 261 रुपिया रोज ले बढ़ा के अब 300 रुपिया रोज कर दे गे हे। ए हिसाब से मजदूरी दर मा सीधा 13 प्रतिशत के बढ़ावा होए हे, जेकर ले ग्रामीण इलाका मा काम करइया भाई-बहिनी मन ल बड़ आर्थिक लाभ मिलही अउ देहात के आजीविका अउ मजबूत होही।
भारत सरकार के ग्रामीण विकास मंत्रालय कोति ले जारी अधिसूचना मा छत्तीसगढ़ समेत आन-आन राज्य मन बर घलो संसोधित मजदूरी दर तय करे गे हे। अधिसूचना के मुताबिक छत्तीसगढ़ बर अकुशल हाथ के काम (हस्त कार्य) बर मजदूरी दर 300 रुपिया रोज तय करे गे हे। राज्य सरकार कोति ले वीबी जी राम जी योजना ल बढ़िया ढंग से चलाए बर अउ गांव के परिवार मन ल रोजगार दे बर जम्मो जरूरी तैयारी कर ले गे हे।
भोपालपट्टनम मा मनखे मन बनाइन सांकल (मानव श्रृंखला) आज ले वीबी जीरामजी पूरे देस के साथ हमर राज्य मा घलो लागू हो गे हे। जेकर जम्मो राज्य के मजूर मन बड़ उत्साह के साथ स्वागत करत हें। काम के जगा मा मनखे मन मा बड़ उछाह देखन बर मिलत हे। बीजापुर जिला के भोपालपट्टनम तहसील के तामलापल्ली गांव मा ग्रामीण मन ह एक-दूसर के हाथ धर के मानव श्रृंखला (सांकल) बनाइन अउ वीबी जी राम जी के स्वागत करिन। अइसने राज्य के हर गांव मा ए योजना के आए के खुसी मा उत्सव मनाए जात हे अउ सबो ल योजना के जानकारी दे जात हे।
2 जुलाई को ग्राम पंचायत गंडईखुर्द ले होही सुभारंभ 2 जुलाई के तिरुपति, आंध्रप्रदेश ले केंद्रीय ग्रामीण विकास मंत्री श्री शिवराज सिंह चौहान ए कार्यक्रम के सुभारंभ करिहें, त उहें हमर राज्य मा ए कार्यक्रम कबीरधाम (कवर्धा) जिला के बोड़ला विकासखंड के ग्राम पंचायत गंडईखुर्द मा रखे गे हे। ए मउका मा उप मुख्यमंत्री अउ पंचायत व ग्रामीण विकास मंत्री श्री विजय शर्मा कार्यक्रम मा सामिल होहिं।
अब 125 दिन तक रोजगार के गारंटी ए योजना के तहत गांव के परिवार मन ल साल मा 125 दिन तक रोजगार के गारंटी, 15 दिन के भीतर मजदूरी के भुगतान, बेरोजगारी भत्ता, डिजिटल जॉब कार्ड अउ तकनीक आधारित काम प्रबंधन प्रणाली मिलही। अब समय म अउ साफ-सुथरा भुगतान के व्यवस्था मजूर मन ल मिलही। वीबी जीरामजी मा पानी बचाओ (जल संरक्षण), सिंचाई, गांव के सड़क, रुख-राई लगाना (वृक्षारोपण) अउ टिकाऊ संपति बनाए के संग-संग गांव के युवा मन के कौशल विकास अउ आजीविका बर बड़ जोर दे गे हे। अब ग्राम पंचायत मन मा विकास काम के योजना ग्राम सभा के माध्यम ले तैयार करे जाही, जेकर ले गांव के जरूरत के हिसाब से काम मन ल चुने जा सकी।
